ەير استانا اۋە كومپانياسى 2015 -جىلى 4 ميلليونعا جۋىق جولاۋشى تاسىمالداعان

الماتى. قازاقپارات - بۇگىن الماتىدا Air Astana اۋە كومپانياسىنىڭ كورپوراتيۆتىك الەۋمەتتىك جاۋاپكەرشىلىگى تۋرالى ەسەبى تىڭدالدى.

وندا اتالمىش اۋە كومپانياسىنىڭ پرەزيدەنتى پيتەر فوستەر جۋرناليستەرگە وتكەن جىلى اتقارىلعان جۇمىستار مەن الداعى جوسپارلار تۋرالى اڭگىمەلەپ بەردى.

«2015 -جىلى كومپانيا - 47,7 ميلليون دوللار كولەمىندە پايدا تاپتى. بۇل 2014 -جىلمەن سالىستىرعاندا - 144 پايىزعا جوعارى.

وتكەن جىلى ءبىز - 3,86 ميلليون جولاۋشىنى تاسىمالدادىق. ال بۇل كورسەتكىش 2014 -جىلمەن سالىستىرعاندا 2 پايىزعا كوپ»، - دەدى پ. فوستەر.

سونىمەن قاتار، ول 2016 -جىلى ۇلان-باتور جانە تەگەران قالالارى باعىتىندا جاڭا رەيستەر اشىلاتىندىعىن جەتكىزدى.

پ. فوستەردىڭ ايتۋىنشا، كومپانيا كەيبىر شىعىنداردى ازايتۋدىڭ ارقاسىندا وڭ ناتيجەلەرگە قول جەتكىزگەن. مىسالى، اۆياتسيالىق كەروسين بويىنشا ءبىرقاتار شىعىندار ۇنەمدەلدى.

 سونداي- اق، كەزدەسۋ بارىسىندا ۇلتتىق اۋە تاسىمالداۋشى كومپانيانىڭ باسشىلىعى الەۋمەتتىك سالادا اتقارىلىپ جاتقان جۇمىستار جايىندا اڭگىمەلەدى.

«ءبىز قازاقستاننىڭ قايىرىمدىلىق جوبالارىن جۇزەگە اسىرۋعا بەلسەنە اتسالىسىپ كەلەمىز. ءبىز مۇنى ماقتان تۇتامىز. ەندى ءبىز الداعى ۋاقىتتا دا ۇلى وتان سوعىسىنىڭ ارداگەرلەرىنە جانە شەت ەلدەردە ەمدەلۋى قاجەت بالالارعا قولداۋ كورسەتۋدى جالعاستىراتىن بولامىز. وتكەن جىلى وسىنداي 130 بالا تەگىن تاسىمالداندى. بيىل، سوڭعى ءۇش اپتانىڭ ىشىندە 11 بالا كومپانيا ەسەبىنەن شەت ەلدەرگە تەگىن ۇشتى. سونداي-اق، الدپعى ۋاقىتتا قايىرىمدىلىق قورلارمەن ىنتىماقتاسۋدى جالعاستىرۋدى جوسپارلاپ وتىرمىز»، - دەدى پ. فوستەر.

اۆتور: جاپپاربەرگەن ايبوتا