ەسەپ كوميتەتى 2015-جىلى ءتيىمسىز يگەرىلگەن قاراجاتتى 459 ميلليارد تەڭگەگە باعالادى
بۇل تۋرالى بۇگىن پارلامەنت ماجىلىسىندە 2015-جىلعى رەسپۋبليكالىق بيۋدجەتتىڭ اتقارىلۋى تۋرالى ۇكىمەت ەسەبىنە رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ قورىتىندىسى تۋرالى بايانداعان كوميتەت مۇشەسى جانسەيىت سارسەنقۇلوۆ ءمالىم ەتتى.
ەسەپ كوميتەتى مۇشەسىنىڭ ايتۋىنشا، جالپى العاندا ۇكىمەت 2015-جىلعى رەسپۋبليكالىق بيۋدجەتتىڭ تۇسىمدەرى بويىنشا ناقتىلانعان جوسپارلى پارامەترلەر مەن شىعىستار بويىنشا مىندەتتەمەلەردى ورىنداعان.
«2015-جىلدىڭ سوڭىندا جۇرگىزىلگەن ناقتىلاۋلار مەن تۇزەتۋلەرگە قاراماستان، بيۋدجەتتىڭ يگەرىلمەگەن قاراجاتى 7,8 ميلليارد تەڭگەنى قۇراپ وتىر. سونىمەن قاتار، بىلتىرعى جىل سوڭىنا تامان ارتىق قارىز الىنعاندىقتان 2014-جىلمەن سالىستىرعاندا ايتارلىقتاي اسىپ، 264,4 ميلليارد تەڭگە سوماسىنداعى بيۋدجەت قاراجاتى قالدىق قالىپتاستى. بۇعان قوسا، 2015-جىلعا بەلگىلەنگەن 8,2 تريلليون تەڭگە كولەمىندە ۇكىمەتتىك بورىش ليميتى 464,7 ميلليارد تەڭگەگە اسىپ كەتكەن»، - دەدى ج. سارسەنبايەۆ.
ونىڭ سوزىنە قاراعاندا، ۇكىمەت يگەرىلمەگەن سومالاردى ەسەپكە الا وتىرىپ، 2015-جىلى ءتيىمسىز پايدالانىلعان قاراجاتتى 232,2 ميلليارد تەڭگە شاماسىندا كورسەتكەن.
«الايدا، ءبىزدىڭ باعالاۋىمىزشا بۇل 227 ميلليارد تەڭگەگە ارتىق جانە 2015-جىلى ءتيىمسىز يگەرىلگەن قاراجات 459 ميلليارد تەڭگە بولىپ تابىلادى»، - دەي كەلە ەسەپ كوميتەتىنىڭ مۇشەسى ايىرمانىڭ قالاي قالىپتاسقانىن دا ءتۇسىندىردى. ونىڭ ايتۋىنشا، ءتيىمسىز پايدالانىلعان قاراجات اياسىندا ەسەپ كوميتەتى مەن تەكسەرۋ كوميسسيالارى انىقتاعان 200 ميلليارد تەڭگەگە جۋىق قارجىلىق بۇزۋشىلىقتار قوسىلعان. وعان قوسا ءتيىمسىز قاراجاتقا كۆازي مەملەكەتتىك سەكتور سۋبەكتىلەرىنىڭ 76,5 ميلليارد تەڭگە سوماسىنداعى قالدىعى دا قامتىلىپ وتىر.
اۆتور: قانات مامەتقازى ۇلى
