استانادا «بلوگيادا-2015» كونكۋرسىنىڭ جەڭىمپازى 1 ميلليون تەڭگەنى ۇتىپ الدى
«نۇر وتان» پارتياسىنىڭ قولداۋىمەن «جىگەر. ابىروي. سانا» قوعامدىق قورى ۇيىمداستىرعان شارا «ساپالى كونتەنتكە - ميلليون!» ۇرانى اياسىندا وتكىزىلدى.
جارىسقا ش ق و، و ق و، قاراعاندى، اتىراۋ وبلىستارى جانە الماتى، استانا قالالارىنان 12 بلوگەر قاتىستى. بلوگيادا بارىسىندا 5 اي ىشىندە قازاق حاندىعى، سپورت، تەڭگە كۋرسى، الەۋمەتتىك مەديا، اقپاراتتىق قاۋىپسىزدىك، كونۆەرگەنتتى جۋرناليستيكا، يننوۆاتسيا جانە دە باسقا تاقىرىپتاردا جۇزگە جۋىق پوست جازىلدى.
بەس ايلىق مارافوننىڭ ناتيجەسىندە 1- ورىندى بلوگەرلىك قىرىمەن دە تانىمال ورت-ەۋرازيا تەلەارناسىنىڭ جاڭالىقتار جۇرگىزۋشىسى مارالبەك ساعىنعانوۆ يەلەندى. 2-ورىن تانىمال بلوگەر مەرەي ەرمۇحانوۆتىڭ قانجىعاسىندا. ال 3-ورىندى ەۋرازيا ۇلتتىق ۋنيۆەرسيتەتىنىڭ ستۋدەنتتەرى ايگەرىم توقسانبەك پەن نازەركە ابيبۋللا ءبولىستى.
باس جۇلدە يەسىنە 1000000 تەڭگە، 2-ورىنعا 500000، 3-ورىندارعا (ەكى 3-ورىن) 250000 تەڭگەدەن سىياقى تابىستالدى.
ايتا كەتەيىك، بلوگيادا - قازاق بلوگەرلەرىنىڭ جازبا جارىسى. بيىل ەكىنشى رەت وتكىزىلىپ وتىر. بايقاۋ ەرەجەسىنە سايكەس، ءار اپتا سايىن بەلگىلەنگەن تاقىرىپتار بويىنشا بلوگەرلەر ءوز بلوگتارىندا جازبا جازدى. بلوگيادا ءادىل قازىلارى بۇل جازبالاردى تەحنيكالىق جانە مازمۇندىق تۇرعىدا باعالادى. قازىلار قۇرامى ەرلان وسپان، اسحات ەركىمباي، اسقار بازارباي سىندى تانىمال ارداگەر بلوگەرلەردەن قۇرالدى.
