قاراعاندى وبلىسىنىڭ بۇرىنعى اكىمى ب. ابدىشەۆتى قاماۋ مەرزىمى 2015 -جىلعى 18 -شىلدەگە دەيىن ۇزارتىلدى

قاراعاندى. قازاقپارات - سىبايلاس جەمقورلىق جاساعانى ءۇشىن كۇدىكتى دەپ تانىلعان قاراعاندى وبلىسىنىڭ بۇرىنعى اكىمى باۋىرجان ابدىشەۆتىڭ قاماۋ مەرزىمى 2015 -جىلعى 18 -شىلدەگە دەيىن ۇزارتىلدى، دەپ حابارلادى «قازاقپارات» ح ا ا ءتىلشىسى.

«مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ تەرگەۋ جەدەل توبى باسشىسىنىڭ قولداۋحاتى قاناعاتتاندىرىلسىن. قىلمىستىق ءىس ماتەريالدارىمەن تانىسۋ كەزەڭىندە ب. ابدىشەۆتى قاماقتا ۇستاۋ مەرزىمى 2015 -جىلعى 18 -شىلدەگە دەيىن ۇزارتىلسىن»، دەگەن قاۋلىنى وقىدى قاراعاندى ق. قازىبەك ءبي اۋداندىق سوتىنىڭ سۋدياسى ەركەش ماۋكەن.

ب. ابدىشيەۆكە ق ر ق ك 307-بابى 4-بولىگى (قىزمەتتىك وكىلەتتىگىن اسىرا پايدالانۋ)، ق ر ق ك 310-بابى 3-بولىگىندە (كاسىپكەرلىك قىزمەتكە زاڭسىز قاتىسۋ) كوزدەلگەن قىلمىستى جاسادى دەگەن كۇدىك تاعىلدى.

قولداۋحاتتا ماتەريالدارمەن كۇدىكتى سەرىك احمەتوۆ، عابيت مۇحامبەتوۆ پەن ونىڭ ادۆوكاتتارى تانىسۋدى جالعاستىرىپ جاتقانى اتاپ وتىلگەن.

ب. ابدىشەۆتىڭ ادۆوكاتى سەرىك الپىسوۆ سوتتا ونىڭ قورعالۋشىسى ماتەريالدارمەن ءبىر اي بۇرىن تولىقتاي تانىسقانىن حابارلادى.

 قاراعاندى ق. قازىبەك ءبي اۋداندىق سوتىنىڭ 13 -ماۋسىمداعى قاۋلىلارىمەن باسقا دا توپتىق سىبايلاس جەمقورلىققا كۇدىكتىلەردىڭ قاماۋ مەرزىمى ۇزارتىلدى: «مەتاللۋرگيا- مەتالل وڭدەۋ» يندۋستريالدىق پاركى» ج ش س بۇرىنعى ديرەكتورى اناتولي ەسسە، «قازاقستاندىق ونەركاسىپتىك كورپوراتسيا» ج ش س باس ديرەكتورىنىڭ بۇرىنعى ورىنباسارى ءالجان اقمولدايەۆ - ءار قايسىسىنا ءبىر ايدان.

بۇدان بۇرىن حابارلانعانداي، ءبىر كۇن بۇرىن قازىبەك ءبي اۋداندىق سوتى بۇرىنعى قورعانىس ءمينيسترى س. احمەتوۆتىڭ قاماۋ مەرزىمىن ماتەريالدارمەن تانىسۋ كەزەڭىندە 2015 -جىلعى شىلدەگە دەيىن ۇزارتىلعانى حابارلانعان. بۇدان باسقا، قاراعاندىنىڭ بۇرىنعى اكىمى مەيرام سماعۇلوۆتىڭ، قالالىق جەر قاتىناستارى ءبولىمىنىڭ باسشىسى ەرنار دارىبەكوۆتىڭ قاماۋ مەرزىمدەرى ۇزارتىلعان.

سوت قاۋلىسى زاڭدى كۇشىنە ەنگەن جوق، اپپەلياتسيالىق ساتىدا شاعىمدانۋعا نە نارازىلىق بىلدىرۋگە بولادى.

ەسكە سالساق، قاراعاندى وبلىسى اكىمدىگىنىڭ لاۋازىمدى تۇلعالارىنا قاتىستى قوزعالعان قىلمىستىق ءىس ءبىر وندىرىسكە بىرىكتىرىلگەن.

تەرگەۋ جەدەل توبى 2015 -جىلعى قاڭتاردا جۇمىسىن اياقتادى. «30 -قاڭتاردا كۇدىكتىلەر، قورعاۋشىلار، جابىرلەنۋشىلەر قىلمىستىق ءىس ماتەريالدارىمەن تانىسۋ قۇقىعى تۇسىندىرىلە وتىرىپ، تەرگەۋ ءوندىرىسىن اياقتالعانى تۋرالى جازباشا حابارلانعان. سونىمەن قاتار قىلمىستىق ءىس ماتەريالدارى 150 تومنان اسادى. ءىس بويىنشا 20 كۇدىكتى بار»، - دەپ حابارلادى پروتسەسسۋالدىق پروكۋرور ديار ءادىلوۆ.

قاتىسۋشىلار ءىرى كولەمدە بيۋدجەت قاراجاتىن قىمقىرعانى، لاۋازىمدىق مىندەتتەرىن اسىرا پايدالانعانى ءۇشىن ايىپتالۋدا. س. احمەتوۆ سونداي-اق پارا الدى دەپ كۇدىكتەلۋدە.