سەرىك احمەتوۆتى ءۇيقاماقتا ۇستاۋ مەرزىمى 2015 - جىلدىڭ 18 - ماۋسىمىنا دەيىن ۇزارتىلدى

 قاراعاندى. قازاقپارات - اۋىر سىبايلاس جەمقورلىق قىلمىستارىنا قاتىسى بار دەپ كۇدىكتەلگەن ق ر بۇرىنعى قورعانىس ءمينيسترى سەرىك احمەتوۆتى ءۇيقاماقتا ۇستاۋ مەرزىمى تاعى ءبىر ايعا، ياعني 2015 - جىلدىڭ 18- ماۋسىمىنا دەيىن ۇزارتىلدى،

 دەپ حابارلادى «قازاقپارات» ءتىلشىسى سوت وتىرىسىنان.

«قىلمىستىق ءىس ماتەريالدارىمەن تانىسۋ كەزەڭىنە بايلانىستى س. احمەتوۆكە قاتىستى ءۇيقاماقتا ۇستاۋ مەرزىمى 2015 -جىلدىڭ 18 ماۋسىمىنا دەيىن ۇزارتىلسىن»، - دەگەن قاۋلىنى قاراعاندى قالاسى قازىبەك بي اۋداندىق سوتىنىڭ تەرگەۋ سۋدياسى ەركەش ماۋكەن جاريا ەتتى.

 ەسكە سالا كەتەيىك، ءىرى كولەمدەگى قاراجاتتى جىمقىردى دەپ ايىپتالعان س. احمەتوۆكە قاتىستى سوت 3-ايعا - 2015 -جىلدىڭ 18 - اقپانىنا دەيىن ءۇيقاماق تۇرىندەگى بۇلتارتپاۋ شاراسىن سانكسيالاعان، كەيىن ءۇيقاماق شاراسى 18 - ساۋىرگە دەيىن، ودان سوڭ اعىمداعى جىلدىڭ 18 - مامىرىنا دەيىن ۇزارتىلدى.

 بۇدان بۇرىن ق ر مەملەكەتتىك قىزمەت ىستەرى جانە سىبايلاس جەمقورلىقپەن كۇرەس اگەنتتىگىنە سىلتەمە جاساپ حابارلانعانداي، قاراعاندى وبلىسىنىڭ جانە قاراعاندى قالاسىنىڭ، «سارى ارقا» اكك» ۇ ك ا ق، «مەتاللۋرگيا- مەتالل وڭدەۋ» يندۋستريالىق پاركى ا ە ا، «قاز اگرو قارجى» ا ق بۇرىنعى باسشىلارى ب. ابدىشيەۆكە، م. سماعۇلوۆقا، ا. ەسسەگە، گ. راحىمجانوۆقا جانە باسقا دا تۇلعالارعا قاتىستى ءبىرقاتار اۋىر سىبايلاس جەمقورلىق قىلمىستىق ىستەرى تەرگەلۋدە. تەرگەۋدەگى ىستەر بارىسىندا س. احمەتوۆ تە ۇستالىپ، ودان ءارى وعان ايىپ تاعىلدى.

 س. احمەتوۆ 2009 - جىلدىڭ قاراشاسىنان 2012 - جىلدىڭ قاراشاسىنا دەيىن قاراعاندى وبلىسىنىڭ اكىمى بولدى. بۇدان كەيىن ق ر پرەمەر- ءمينيسترىنىڭ ءبىرىنشى ورىنباسارى، ق ر پرەمەر- ءمينيسترى، ال 2014 - جىلدىڭ 3 - ساۋىرىنەن 22 - قازانعا دەيىن ق ر قورعانىس ءمينيسترى لاۋازىمىندا جۇمىس جاسادى.