وتكەن 2014 - جىل قىتاي ديپلوماتياسى ءۇشىن تابىستى بولدى

استانا. قازاقپارات - قىتاي سىرتقى ىستەر مينيسترلىگى وتكەن جىلدىڭ ناتيجەلەرىن قورىتىندىلادى.

ەل باسشىلىعى حالىقارالىق قاتىناستار سالاسىندا ۇلكەن تابىستارعا جەتكەنىن مالىمدەپ وتىر.

2014 - جىل قىتاي ديپلوماتياسى ءۇشىن تابىستى بولعان. ەكونوميكاسى قارقىندى دامىپ كەلە جاتقان اسپان استى ەلىنىڭ حالىقارالىق ساحنادا دا بەدەلى ارتىپ كەلەدى.

ءبىرقاتار كورشى ەلمەن جەر داۋلارى شەشىلمەگەندىكتەن، بولاشاق الپاۋىت دەرجاۆادان ۇلكەن قاتەر سەزىپ جۇرگەندەر دە بار ەكەنى جاسىرىن ەمەس. وسى كۇدىكتى سەيىلتۋ ءۇشىن قىتاي باسشىلارى تەك بەيبىت دامۋدى كوزدەيتىنىن مالىمدەدى.

ۆان ي، قىتاي سىرتقى ىستەر ءمينيسترى:

- 2014 - جىلدىڭ اياعىنا دەيىن ءبىز 70 تەن اسا مەملەكەتپەن ستراتەگيالىق پەن سەرىكتەستىك قاتىناستار ورناتتىق. بۇل الەمنىڭ نەگىزگى ايماقتارى مەن ەلدەرىن قامتيتىن ىنتىماقتاستىق، وزگە بىرەۋلەرگە قارسى باعىتتالعان وداقتار قۇرۋدىڭ ورنىنا بىرىگۋ جولدارىن قاراستىرىپ جۇرگەنىمىزدى بىلدىرەدى.

جالپى قىتاي ديپلوماتتارى وتكەن جىلدىڭ باستى تابىستارىنىڭ ءبىرى رەتىندە ۇلى جىبەك جولىن جاڭعىرتۋ دەپ سانايدى. قازاقستان جەرى ارقىلى وتەتىن وسى ءىرى جوباعا الەمنىڭ 50 دەن اسا مەملەكەتى ۇلكەن قىزىعۋشىلىق بىلدىرۋدە.

ماسۇد حان، پاكىستاننىڭ قىتايداعى ەلشىسى:

- جىبەك جولىن جاڭعىرتۋ ارقىلى ءبىز حالىقتاردى بىرىكتىرىپ، ءوزارا سەنىمىن ارتتىرا الامىز. بۇل جول بەيبىتشىلىك پەن تۇراقتى دامۋدىڭ ماڭىزدى فاكتورىنا اينالاتىنىنا سەنىمدىمىن.

2014 - جىلدىڭ باستى تابىستارى رەتىندە قىتايدا وتكەن ازيا-تىنىق مۇحيت ەكونوميكالىق ىنتىماقتاستىق ۇيىمى سامميتىنىڭ وتكىزىلۋى مەن ەبولا ىندەتى تاراعان باتىس افريكا ەلدەرىنە تەگىن كومەك كورسەتۋى دە اتالعان.

www.24.kz