مادەنيەت-2014: جىلقى جىلىنداعى جاڭا ەسىمدەر

استانا. قازاقپارات - تاريح قويناۋىنا ەنىپ بارا جاتقان جىلقى جىلى قازاقستاندىق ارتىستەر ءۇشىن ءتۇرلى جەڭىستەر مەن جەتىستىكتەرگە تولى بولدى. قازاقپارات حالىقارالىق اگەنتتىگى مادەنيەت سالاسىندا ەلدى ەلەڭ ەتكىزگەن جاڭا ەسىمدەردى ەسكە تۇسىرۋگە تىرىستى.

كينەماتوگرافيا سالاسىندا

بيىلعى مادەنيەت سالاسىنداعى وقيعالار تىزبەگىن اتاقتى اكتەر، قازاق كينوسىنىڭ نەگىزىن قالاۋشى شاكەن ايمانوۆتىڭ 100 جىلدىعىنا ارنالعان شارالار اشىپ بەردى. «قازاقفيلم» كينوستۋدياسى وسى اتاۋلى وقيعاعا وراي كوپتەگەن شارالار ۇيىمداستىردى. كينو شەبەرىنىڭ فيلمدەرى رەستاۆراتسيالانىپ، ساندىق جۇيەگە ءتۇسىرىلدى. ش. ايمانوۆ تۋرالى كىتاپتار، ەسسەلەر مەن مونوگرافيالار، فوتوالبومدار باسىلىپ شىقتى. سونىمەن قاتار، رەجيسسەر بولات نۇسىپبەكوۆ قازاقتىڭ ارداقتى ۇلىنىڭ ءومىرى مەن شىعارماشىلىعى تۋرالى دەرەكتى فيلم ءتۇسىردى. قىركۇيەك ايىندا اتى اڭىزعا اينالعان كينورەجيسسەردىڭ 100 جىلدىق مەرەيتويىنا ارنالىپ وتكىزىلگەن Х مەرەيتويلىق «ەۋرازيا» حالىقارالىق كينوفەستيۆالى اياسىندا ونىڭ فيلمدەرى كورسەتىلىپ، ش. ايمانوۆ اتىنداعى قازاق كينوسىنىڭ مۋزەيى اشىلدى.

وپەرا ونەرىندە

اقپان ايىندا ماريا مۋدرياك ەسىمدى جەرلەسىمىز يتاليانىڭ كومو قالاسىندا وتكەن بەدەلدى حالىقارالىق AsLiCo  كونكۋرسىندا توپ جاردى. يتاليانىڭ «Corriere di Сomo» گازەتى مەن باسقا دا بۇقارالىق اقپارات قۇرالدارى قازاقستاندىق وپەرا ءانشىسىن اتالعان كونكۋرستىڭ «بويتۇمارى» دەپ اتاپ، ۇلكەن قۇرمەت كورسەتتى.

بيىل «استانا وپەرا» تەاترىنىڭ ۇجىمى تۇڭعىش رەت الەمدىك تۋرنەگە اتتاندى. ەلوردالىق ارتىستەر ساپار بارىسىندا الەمدىك دەڭگەيدەگى كارنەگي-حولل (نيۋ-يورك، ا ق ش)، Sony Centre for the Performing Arts (تورونتو، كانادا)، باستيليا وپەراسى (پاريج، فرانسيا)، سونداي-اق، انتۆەرپەن (بەلگيا) جانە روتتەردام (نيدەرلاندى) ساحنالارىندا ونەر كورسەتتى.

«استانا وپەرا» تەاترىنىڭ ءانشىسى سالتانات احمەتوۆا «ۇلكەن وپەرا» جوباسىندا ءبىرىنشى ورىندى يەلەندى. كونكۋرستىڭ فينالى پ. چايكوۆسكي اتىنداعى ماسكەۋ كونسەرۆاتورياسىنىڭ ۇلكەن زالىندا قاراشا ايىندا وتكەن بولاتىن. كورەرمەندەردىڭ س م س داۋىس بەرۋى كەزىندە س. احمەتوۆ %47 داۋىس جينادى. رەسەيلىك ۆاسيليسا بەرجانسكايا ەكىنشى ورىنعا، بەلارۋستىق يليا سيلچۋكوۆ ءۇشىنشى ورىنعا تۇراقتادى.

جاس تالانتتار

بيىلعى 30- ءساۋىر مەن 5- مامىر ارالىعىندا قىتايدا وتكەن «كوكتەمگى داۋىس» حالىقارالىق ۆوكال كونكۋرسىندا 13 جاسار ايىم سامەكەيەۆا گران-پري جۇلدەسىن ۇتىپ الدى.

ال ون جاسار استانالىق مۇحاممەدالي جۇگىنىسوۆ گرەكيادا وتكەن حالىقارالىق «Paradise Holiday-2014» جاس تالانتتار كونكۋرسىندا تاعى دا گران-پري جۇلدەسىن قانجىعاسىنا بايلادى. جاز سوڭىندا ارتەكتە م. جۇگىنىسوۆ حالىقارالىق «بالالار جاڭا تولقىنىندا» جۇلدەلى ءۇشىنشى ورىنعا تۇراقتادى.

سونداي-اق، ماسكەۋدە وتكەن بالالاردىڭ ونەر فورۋمى مەن VI حالىقارالىق «ونەر عالامشارى» («Planet of arts»)  اتتى فەستيۆال- كونكۋرسى اياسىندا سەمەي قالالىق 2№ مۋزىكا مەكتەبىنىڭ تاربيەلەنۋشىلەرى نازەركە تولەۋبەكوۆا مەن راسۋل سەرىكجان وبلىستىق مامانداندىرىلعان بالەت مەكتەبىنىڭ حورەوگرافيالىق انسامبلىمەن بىرگە «كلاسسيكالىق حورەوگرافيا» اتالىمى بويىنشا گران پري جەڭىپ الدى. ولار سونىمەن قاتار، «ۇلتتىق ءبي» نوميناتسياسى بويىنشا ءبىرىنشى دارەجەلى ديپلومدى دا ەنشىلەدى.

بۇعان قوسا، 14 جاستاعى سەمەي تۇرعىنى ۆانەسسا بەزرودنايا 11-19- ماۋسىمدا لوس-اندجەلەس قالاسىندا وتكەن «World championship of performing arts» حالىقارالىق ونەر چەمپيوناتىندا پوپ جانە روك-ۆوكال نوميناتسياسى بويىنشا جەڭىمپاز اتاندى.

شوۋ-بيزنەس

جىلقى جىلى قازاقستاندىق شوۋ-بيزنەس وكىلدەرىنە دە جەمىستى بولدى. شىلدە ايىندا وتكەن «ۆيتەبسك-2014» XXIII  حالىقارالىق ەسترادالىق ءان ورىنداۋشىلارى كونكۋرسىندا ءانشى مارحابا سابيەۆا 3-ورىنعا تۇراقتادى. ال جانار دۇعالوۆا قاراشا ايىندا «Turkvizyon-2014» حالىقارالىق كونكۋرسىنىڭ جەڭىمپازى اتاندى. تاعى ءبىر قازاقستاندىق ءانشى اناتولي تسوي ت م د ەلدەرىندە تانىمال بولىپ تۇرعان «حوچۋ ك مەلادزە-2» سەرياليتي شوۋىندا كونكۋرستىق ىرىكتەۋ قورىتىندىسى بويىنشا «M-Band» توبىنا مۇشەلىككە قابىلداندى.

اۆتور: ءابۋ-اسقار مەكەش ۇلى