ءتول تەڭگەمىز 2014-جىلدىڭ ەڭ ۇزدىك بانكنوتى دەپ تانىلدى

استانا. قازاقپارات - حالىقارالىق بانكنوت قاۋىمداستىعىنىڭ شەشىمىمەن كۇلتەگىن كونە تۇركى جازبالارى بەينەلەنگەن نومينالى 1000 تەڭگەلىك بانكنوت 2014-جىلدىڭ ەڭ ۇزدىك بانكنوتى دەپ تانىلدى. ءتول تەڭگەمىز مۇنداي حالىقارالىق جوعارى باعانى ءۇشىنشى جىل قاتارىنان يەلەنىپ وتىر، دەپ جازادى 24.kz.

شۆەيتساريانىڭ لوزاننا قالاسىندا وتكەن بايقاۋعا الەمنىڭ ءتۇرلى اقشا ۇلگىلەرى ۇسىنىلعان. ولاردىڭ قاتارىندا 100 ا ق ش دوللارى، جاڭارتىلعان 5 ەۋرو جانە رەسەيدىڭ سوچي وليمپياداسىنا ارنالعان مەرەيتويلىق بانكنوتى بار.

تاۋەلسىز ساراپشىلار كۇلتەگىن كونە تۇركى جازباسى بەينەلەنگەن نومينالى 1000 تەڭگەلىك ەسكەرتكىش بانكنوتتىڭ بىرەگەي ساپاسى مەن ديزاينىن جوعارى باعالاعان. جيىرمادان اسا قورعانىش بەلگىلەرى بار ەسكەرتكىش بانكنوتتى ۇلتتىق بانكتىڭ ديزاينەرلەرى مەڭدىباي الين مەن داستان ماشراپوۆ تاريح ماماندارىمەن كەڭەسە وتىرىپ جاساعان.

ون ميلليون دانامەن باسىلىپ شىققان بانكنوتتىڭ قورعانىش دارەجەسى جەتىلدىرىلگەن. «جىلجىمالى سۋرەت، تۇستەردىڭ اۋىسۋى، اسىرەسە بەينەنىڭ قىرىنان قاراعاندا شىعىڭقى ورنالاسۋى - تەڭگە جاساۋ تەحنولوگياسىندا العاش رەت قولدانىلىپ وتىرعان ءادىس، - دەيدى ماماندار.

اقشا ديزاينىن جاساپ شىعۋعا 2 جىلداي ۋاقىت كەتەدى ەكەن. ساپا ءۇشىن توككەن تەر ناتيجەسىز ەمەس. قازاقستاندا 1 ميلليون دانا اقشاعا ءبىر عانا جالعان اقشادان كەلەدى ەكەن. تەڭگە بانكنوتتارىنىڭ حالىقارالىق بايقاۋدا جۇلدە العانى ءبىرىنشى رەت ەمەس. قۇرامىندا 90 مەملەكەتتەن 2000 عا جۋىق ساراپشى ەنگەن حالىقارالىق بانكنوت قاۋىمداستىعىنىڭ شەشىمىمەن 2011-جىلى نومينالى 10 مىڭ تەڭگەلىك بانكنوت ۇزدىك دەپ تانىلسا، 2012-جىلى 5 مىڭ تەڭگەلىك بانكنوت تا جوعارى باعالانعان ەدى.