ازيادا-2014: قازاق-يران باسەكەسى باستالدى

استانا. قازاقپارات - ХVІІ جازعى ازيا ويىندارىنىڭ 11- كۇنى كەشەگىدەي قۋانىشتى دا، ءساتتى دە بولمادى. قورجىنىمىزعا ءۇش قولا عانا ءتۇسىپ، يران وكشەمىزدى باستى، - دەپ حابارلايدى وڭتۇستىك كورەيادان «الاش ايناسىنىڭ» ارناۋلى ءتىلشىسى.

بۇگىن بوز كىلەمگە گرەك-ريم كۇرەسىندەگى بالۋاندار شىققان. وكىنىشكە قاراي، قازاق بالۋاندارى فينالعا دا شىعا المادى.

59 كەلىدە باق سىناعان المات كەبىسبايەۆ تا، 71 كەلىدە بەلدەسكەن ەرۇلان ىسقاقوۆ تا قولا جۇلدەمەن شەكتەلدى. ال 98 كەلىدەگى ماقسات ەرەجەپوۆ شيرەك فينالدان اسا المادى.

ءۇشىنشى قولا بوكستان بۇيىردى. ايەلدەر اراسىنداعى ۇزدىك بوكسشىمىز مارينا ۆولنوۆا (75 كەلى) فينالعا شىعا الماي قالدى. سوندىقتان ونىڭ قولا جۇلدەسى ءبىزدىڭ ەنشىمىزگە بۇگىن جازىلدى.

جالپى، بوكستان 10 مەدال ولجالاپ وتىرمىز. بۇگىن جاينا شەكەربەكوۆا (51 كەلى) فينالدا ايقاسادى. ال سەگىز جىگىتىمىز ەرلەر اراسىنداعى جارتىلاي فينالعا شىقتى. ەندى «وسى توعىز جۇلدەمىزدىڭ قانشاسى التىن بولار ەكەن» دەپ، تىقىرشىپ وتىرعان جايىمىز بار.

ەستەرىڭىزگە سالا كەتەيىك، جارتىلاي فينالعا مىنا جىگىتتەرىمىز شىقتى: ءبىرجان جاقىپوۆ (49 كەلى)، ءىلياس سۇلەيمەنوۆ (52 كەلى)، قايرات ەراليەۆ (56 كەلى)، دانيار ەلەۋسىنوۆ (69 كەلى)، جانىبەك ءالىمحان ۇلى (75 كەلى)، ادىلبەك نيازىمبەتوۆ (81 كەلى)، انتون پينچۋك (91 كەلى) جانە يۆان دىچكو (+ 91 كەلى).

سۋ دوبىنداعى جىگىتتەرىمىز جارتىلاي فينالدا قىتاي قۇراماسىمەن كەزدەسىپ، شەكتەن تىس تارتىستى وتكەن ويىندا (نەگىزگى ۋاقىتى 6:6 ەسەبىمەن اياقتالعان بولاتىن) قايسارلىق تانىتىپ، پەنالتي ارقىلى جەڭىسكە جەتتى.

ال تاەكۆوندوشىلارىمىز كەرىسىنشە، جۇلدەگە ىلىگە الار ەمەس. جەڭىل اتلەتيكادان دا جۇلدەنى ۋىستاپ الا الماي ءجۇرمىز.

ەندى نامىسقا جۇگىنىپ، جانكەشتىلىك تانىتپاسا بولمايدى. يران سپورتشىلارى التىندى كۇرەستەن «كۇرەپ» الىپ، باسقا سپورت تۇرلەرىنەن دە «ىرەپ» الىپ، وكشەمىزدى باستى. ءتىپتى قۋىپ جەتىپ تە قالدى. قامشىنى باسپاسا، ولاردىڭ ەندى بىزدەن وزىپ كەتۋلەرى دە عاجاپ ەمەس.

1. قىتاي - 268 (126+80+62)

2. وڭتۇستىك كورەيا - 170 (54+55+61)

3. جاپونيا - 146 (37+54+55)

4. قازاقستان - 56 (15+16+25)

5. يران - 35 (14+11+10)

اۆتور: نۇرعازى ساسايەۆ