14:22, 30 - قىركۇيەك 2014 | GMT +5
ينچحون-2014: م. ۆولنوۆا قولا مەدالدى قاناعات تۇتتى
استانا. قازاقپارات - وڭتۇستىك كورەيانىڭ ينچحون قالاسىندا ءوتىپ جاتقان 17- ازيا ويىندارىندا وكىنىشكە قاراي، 75 كەلى سالماق دارەجەسىندە جارىس جولىنا شىققان بوكسشىمىز مارينا ۆولنوۆا قارسىلاسىنان ايلاسىن اسىرا المادى. بۇل تۋرالى ق ر بوكس فەدەراتسياسىنىڭ باسپا ءسوز قىزمەتىنەن حابارلادى.
بوكستان قازاقستان ۇلتتىق قۇراماسىنىڭ كوشباسشىسى مارينا ۆولنوۆا جارتىلاي فينالدا كورەي حالىق دەموكراتيالىق رەسپۋبليكاسىنىڭ بىلعارى قولعاپ شەبەرى ۋنحۋ يانگپەن جۇدىرىقتاسقان بولاتىن. الەم بىرىنشىلىگىنە ەكى مارتە قاتىسقان كورەيلىك بوكسشى م. ۆولنوۆانىڭ فينالعا شىعۋىنا ەش مۇمكىندىك بەرمەدى. كەزدەسۋ قورىتىندىسى 3:0 ەسەبىمەن ۋ. يانگتىڭ پايداسىنا شەشىلدى.
دەگەنمەن، مارينانىڭ قورجىنىندا ازيادا ويىندارىنىڭ قولا مەدالى بار.
اۆتور: مارلان جيەمباي
