21:18, 29 - ماۋسىم 2014 | GMT +5
مۇحيت تۇرسىنوۆ «قازاقستان بارىسى-2014» جەڭىمپازى اتاندى
استانا. قازاقپارات - بۇگىن استاناداعى «سارى ارقا» كەشەنىندە «قازاقستان بارىسى-2014» اتاعى ءۇشىن قازاق كۇرەسىنەن رەسپۋبليكالىق تۋرنير ءوتتى.
اقتىق سىندا قاراعاندى وبلىسىنىڭ وكىلى اسىل بارمەنوۆ پەن شىعىس قازاقستان نامىسىن قورعاعان مۇحيت تۇرسىنوۆ بەلدەسكەن بولاتىن. مۇندا ەكى پالۋان دا ءبىرىن-ءبىرى جىعا الماي، نەگىزگى ۋاقىتتى يتجىعىسپەن اياقتاعان.
قوسىمشا مينۋت بەلگىلەنگەن سوڭ، قارسىلاستار قويان-قولتىق سايىسقا ءتۇستى. ول بەلدەسۋدە شىعىس قازاقستاندىق مۇحيت تۇرسىنوۆ ءوز قارسىلاسىن بەلدىگىنەن كوتەرىپ الىپ، الاڭ سىرتىنا شىعارىپ جىبەردى.
قولا جۇلدە «سىر بارىسى» رۋسلان ءابدىرازاقوۆقا بۇيىردى. ءۇشىنشى ورىن ءۇشىن تالاستا ول «تالاس ارلانى» داۋلەتحان جاقىپوۆتى (جامبىل وبلىسى) تىزە بۇكتىردى. دەگەنمەن داۋلەتحان جاقىپوۆ كورەرمەن كوزايىمىنا اينالىپ، سۋ جاڭا اۆتوكولىككە يە بولدى.
ايتا كەتەيىك، «قازاقستان بارىسى» اتاعىنىڭ يەگەرى 150 مىڭ ا ق ش دوللارىن جانە التىن «تايتۇياق» ۇتىپ الدى.
