11:41, 29 - قىركۇيەك 2014 | GMT +5
ينچحون-2014: قازاقستاندىقتار 12- التىنعا قول جەتكىزدى
ورال. قازاقپارات - بۇگىن قازاقستان ۇلتتىق قۇراماسى ساپىندا باتىسقازاقستاندىق ەسكەكشىلەر ينچحوندا ءوتىپ جاتقان ازيا ويىندارىنىڭ چەمپيونى اتاندى.
الدىمەن ورالدىق الەكسەي دەرگۋنوۆ ەكى كىسىلىك بايداركادا ەۆگەنيي الەكسەيەۆپەن بىرگە 1 مىڭ مەتر قاشىقتىقتا ۇزدىك شىقتى. ا. دەرگۋنوۆ - لوندون وليمپياداسىنا قاتىسقان تاجىريبەلى سپورتشى.
سونداي-اق تاعى ءبىر باتىسقازاقستاندىق اندرەي ەرگۋچيەۆ ءتورت كىسىلىك بايداركادا يليا گولەندوۆ، داۋلەت سۇلتانبەكوۆ، الەكساندر ەمەليانوۆپەن بىرگە 1 مىڭ مەتر قاشىقتىقتا قازاقستانعا ون ەكىنشى التىن مەدالدى اكەلدى.
بۇدان بۇرىن ا. دەرگۋنوۆ پەن ا. ەرگۋچيەۆ ازيا چەمپيونى اتانعان بولاتىن. ەندى، مىنە، تاعى ءبىر جەڭىسكە قول جەتكىزىپ وتىر.
اتالمىش ازيا ويىندارىندا وسىعان دەيىن باتىسقازاقستاندىق دزيۋدوشى ازامات مۇقانوۆ قولا جۇلدەگەر اتانعان ەدى.
اۆتور: ەلجان ەرالى
