تارازدا 2011-جىلعى قاراشاداعى وقيعانى جانە «حالىق قاھارمانى» عازيز بايتاسوۆتىڭ ەرلىگىن ەسكە الدى - فوتو
ەسكە سالا كەتەيىك، تارازدا 2011-جىلعى 12- قاراشادا جيھادتىق قوزعالىس جاقتاۋشىسىنىڭ جاساعان قىلمىستارىنىڭ سالدارىنان جەتى ادام قازاعا ۇشىرادى، سونىڭ ىشىندە بەس قۇقىق قورعاۋ ورگاندارىنىڭ قىزمەتكەرى مەن ەكى بەيبىت ازامات بولدى. سونىمەن بىرگە، ىشكى ىستەر ورگاندارىنىڭ ءۇش قىزمەتكەرى جارالاندى. لاڭكەس بەيبىت ادامدارعا وق جاۋدىرىپ جاتقاندا، جول پوليتسەيى عازيز بايتاسوۆ ويلانباستان ولاردى قورعاۋعا ۇمتىلىپ، قىلمىسكەردى توقتاتتى.
ق ر پرەزيدەنتى نۇرسۇلتان نازاربايەۆتىڭ جارلىعىمەن قازاقستان رەسپۋبليكاسى الدىندا سىڭىرگەن كورنەكتى ەڭبەگى، قىزمەتتىك بورىشىن اتقارۋدا كورسەتكەن ەرجۇرەكتىگى مەن جانقيارلىعى ءۇشىن جامبىل وبلىسى ءى ءى د جول پوليتسياسى باتالونى ءبىرىنشى ۆزۆودىنىڭ كومانديرى عازيز ابدىبەك ۇلى بايتاسوۆقا (مارقۇم) «حالىق قاھارمانى» اتاعى بەرىلدى.
«ءبىز سەنى ۇمىتپايمىز، عازيز!» - تاراز ءى ءى ب جول-تورۋىل پوليتسياسى باتالونىنىڭ بۇل اكسياسى تارازدا 12- قاراشادا كۇنى بويى جالعاستى. پوليتسيا قىزمەتكەرلەرى حالىق قاھارمانى عازيز بايتاسوۆ قازا بولعان جەرگە قىزىل قالامپىر گۇلدەرىن قويدى.
گۇل شوقتارىن قويۋ ءراسىمى، سونداي-اق وبلىس ءى ءى د گەنەرالدار اللەياسىندا حالىقتىق باتىر، پوليتسيا كاپيتانى عازيز بايتاسوۆتىڭ كەۋدە ءمۇسىنى جانىندا دا ءوتتى. قازا بولعان پوليتسيا قىزمەتكەرلەرىنىڭ تۋىستارى، ارداگەرلەر، تاراز گارنيزونىنىڭ جەكە قۇرامى، جاستار، جۇرتشىلىق جانە ب ا ق وكىلدەرى قازا بولعان باتىرلاردى ەسكە تۇسىرۋگە كەلدى.
«حالىق قاھارمانى، پوليتسيا كاپيتانى عازيز بايتاسوۆتى ەسكە الا وتىرىپ، لاڭكەستى ۇستاۋدا قازا بولعان پولات ايانقۇلوۆتى جانە جاقسىبەك بايسەيىتوۆتى، سونداي-اق قىلمىسپەن كۇرەستە ءومىرىن قيعان جامبىل وبلىسى ىشكى ىستەر ورگاندارىنىڭ بارلىق قىزمەتكەرلەرىن ەسكە الامىز. قازاقستاننىڭ بارلىق پوليتسەيلەرى ءوز ارىپتەستەرىنىڭ باتىرلىعىن ەشقاشان ۇمىتپايدى»، - دەدى قارالى ميتينگىدە وبلىستىق ءى ءى د باستىعى، پوليتسيا پولكوۆنيگى بەكەت ايماعامبەتوۆ.
عازيز بايتاسوۆتىڭ جەسىرى گۇلجامال تاجيەۆا ونى ەسكە العانى جانە وتباسىنا قامقورلىعى ءۇشىن بارلىعىنا العىس ايتتى. پوليتسيا قىزمەتكەرلەرىنە قاراتا ايتقان سوزدەرىندە ول ادال قىزمەت ەتىپ، ۇيلەرىنە امان ورالۋىنا تىلەكتەستىگىن ءبىلدىردى.
تارازدىڭ بارلىق وقۋ ورىندارىندا «ەرلىك ساباقتارى» ءوتتى. جاستار اۆياتسيالىق ورتالىعىنىڭ كۋرسانتتارى حالىق قاھارمانى ع. بايتاسوۆتىڭ ەرلىگىنە ارنالعان پاتريوتتىق اكسياعا قاتىستى.
جامبىل وبلىسىندا حالىق باتىرىنىڭ ەسىمىن ەستە ساقتاۋ ءۇشىن عازيز بايتاسوۆتىڭ تۋعان جەرى بايزاق اۋدانىنىڭ تۇيمەكەنت اۋىلىنداعى ول وقىعان مەكتەپ ونىڭ ەسىمىمەن اتالعان. اۋدان ورتالىعى سارىكەمەردەگى داڭق اللەياسىنا مەموريالدىق تاقتا ورناتىلعان.
