قازاقستاندا 2011-جىلدان بەرى 183 ناۋقاستىڭ باۋىرى الماستىرىلعان

استانا. قازاقپارات -  ەلىمىزدە 500-گە جۋىق ادام باۋىر الماستىرۋ وپەراتسياسىنا كەزەكتە تۇر. بۇل تۋرالى سىزعانوۆ اتىنداعى ۇلتتىق عىلىمي حيرۋرگيا ورتالىعىنىڭ باسقارما ءتوراعاسى بولات بايماحانوۆ حابارلادى.

 بۇگىن الماتىدا دۇنيەجۇزىلىك دەنساۋلىق كۇنىنە وراي وزگەلەرگە ءومىر سىيلاعان دونورلار «باۋىرىمدى باۋىرىما سىيلايمىن» ەستەلىك مەدالىمەن ماراپاتتالدى.

مىنا ادامدار مەن بۇلدىرشىندەردىڭ بال- بۇل جانعان جۇزىنە قاراپ قايسىسى دونور، قايسىسى رەتسيپيەنت ەكەنىن اجىراتۋ قيىن. وپەراتسيا ءساتتى ءوتىپ، بۇگىندە سۇرەڭسىز كۇندەر مەن ۇيقىسىز تۇندەر ارتتا قالعان. ەلىمىزدە تۇڭعىش باۋىر الماستىرۋ وپەراتسياسى فاتيما بايتامايەۆاعا جاسالعان بولاتىن.

فاتيما بايتامايەۆا، شىمكەنت قالاسىنىڭ تۇرعىنى:

 - ءتورت اپكەمنىڭ ىشىنەن ەڭ دۇرىس كەلگەنى، ەڭ سايكەس كەلگەنى وسى اپكەم بولعان سوڭ، 2011 -جىلدىڭ 9 - جەلتوقسان كۇنى قازاقستاندا العاش رەت باۋىر اۋىستىرۋ بويىنشا ماعان وپەراتسيا جاسالىندى.

گۇلزيرا بايتامايەۆا، دونور، فاتيمانىڭ اپكەسى:

- ءۇش ايدان كەيىن جۇمىسقا شىعىپ كەتتىم. جۇمىس ىستەپ جاتىرمىن. قازىرگى كۇنگە دەيىن جۇمىستامىز. سول 2011 -جىلدان بەرى قازاقستاندا 183 باۋىر الماستىرىلعان.

شەتەلدەردە 150-200 مىڭ دوللار تۇراتىن وپەراتسيا ەلىمىزدە تەگىن جاسالادى. الماتىنىڭ باس ترانسپلانتولوگى بولات بايماحانوۆتىڭ ايتۋىنشا، قازاقستاندىق دونورلاردىڭ 80 پايىزى ناۋقاسقا تۋىس بولىپ كەلەدى. ال قايتىس بولعان ادامداردىڭ اعزاسىن وزگەلەرگە سالۋ سيرەك كەزدەسەدى. بۇگىندە قازاقستاندا 500-گە جۋىق ادام باۋىر الماستىرۋ وپەراتسياسىنا كەزەكتە تۇر.

 بولات بايماحانوۆ، ا. سىزعانوۆ اتىنداعى ۇلتتىق عىلىمي حيرۋرگيا ورتالىعىنىڭ باسقارما ءتوراعاسى:

 - قايتىس بولعان ادامنان ورگاندى الىپ، رەتسيپيەنتكە سالا سالادى. بۇل جەردە ەكى ادامنىڭ ومىرىنە جاۋاپ بەرەمىز. ونىڭ ىشىندە دونورعا. ول ساۋ ادام ءوزىنىڭ ىقىلاسىمەن بەرىپ جاتقاننان كەيىن ەرتەڭ ءبارى دۇرىس بولۋ كەرەك. بىلتىردان باستاپ اتالعان وپەراتسيا نارەستەلەرگە دە جاسالا باستادى. قازىر كىشكەنتاي اسىلايدىڭ وزگە بۇلدىرشىندەردەن ەش ايىرماشىلىعى جوق.

قۇرالاي قازاقبايەۆا، اسىلايدىڭ اناسى:

 - قىزىمىز وتە اقىلدى. ءوزى بۇزىقتاۋ كەلگەن قىز. ءوزى كىشكەنتايىنان ومىرگە دەگەن قۇشتارلىعى، ىنتاسى بار بالا ەكەنى ءبىلىنىپ تۇر.

ءىس- شارا بارىسىندا وزگەلەرگە ءومىر سىيلاعان باتىل جاندار ەستەلىك مەدالمەن ماراپاتتالدى. سونداي- اق بىلتىر باۋىرىن الماستىرعان راياننىڭ قازاقى داستۇرمەن تۇساۋى كەسىلدى.

 اۆتورلارى: ۇلان نارىنبەك، مۇحيت قۇدىقبايەۆ

www.24.kz