جىل سايىن ەلىمىزگە 200 شەتەلدىك عالىم تارتىلادى - ساياسات نۇربەك

استانا. قازاقپارات - جىل سايىن بيۋدجەت ەسەبىنەن 570 ستۋدەنت اكادەميالىق ۇتقىرلىق اياسىندا الەمنىڭ جەتەكشى جوعارى وقۋ ورىندارىنا جىبەرىلەدى.

بۇل تۋرالى ۇكىمەت وتىرىسىندا عىلىم جانە جوعارى ءبىلىم ءمينيسترى ساياسات نۇربەك ايتتى، دەپ حابارلايدى قازاقپارات ءتىلشىسى.

«قازاقستان رەسپۋبليكاسىنىڭ 2023-2027 -جىلدارعا ارنالعان كوشى- قون ساياساتىنىڭ تۇجىرىمداماسىندا ءبىلىم بەرۋ يمميگراتسياسى باعىتى بويىنشا 5 ءىس- شارا كوزدەلگەن. بۇل تۇرعىدا اكادەميالىق ۇتقىرلىق جانە شەتەلدىك عالىمداردى تارتۋ، الەمنىڭ جەتەكشى جوعارى وقۋ ورىندارىمەن بىرلەسىپ فيليالدار مەن كامپۋستار قۇرۋ، سونداي- اق جوعارى وقۋ ورىندارىن اككرەديتتەۋ جۇيەسىن جاڭعىرتۋ ەسكەرىلگەن. جىل سايىن رەسپۋبليكالىق بيۋدجەت قاراجاتى ەسەبىنەن 570 ستۋدەنت اكادەميالىق ۇتقىرلىق اياسىندا الەمنىڭ جەتەكشى جوعارى وقۋ ورىندارىنا وقۋعا (ءبىر سەمەسترگە) جىبەرىلەدى. سونىمەن قاتار، جوعارى وقۋ ورىندارىنىڭ بيۋدجەتتەن تىس قاراجاتى ەسەبىنەن جىل سايىن ورتا ەسەپپەن 1500 ستۋدەنت وقيدى. سونداي- اق، جەتەكشى شەتەلدىك عالىمداردى تارتۋ جۇزەگە اسىرىلىپ جاتىر. رەسپۋبليكالىق بيۋدجەت قاراجاتى ەسەبىنەن جىل سايىن 200 شەتەلدىك عالىم تارتىلادى. وسى ورايدا ءبىر سەمەسترلىك نەمەسە عىلىمي الماسۋ باعدارلاماسى ەسكەرىلگەن»، - دەدى س. نۇربەك.

سونىمەن قاتار ول جەتەكشى شەتەلدىك جوعارى وقۋ ورىندارىمەن ىنتىماقتاستىقتى كەڭەيتۋ بويىنشا جۇمىستار جالعاسىپ جاتقانىن ايتتى. 2023 -جىلدىڭ ءبىرىنشى جارتى جىلدىعىندا عانا ج و و- لار الەمنىڭ 82 ەلىمەن 5162 شارت اياسىندا ىنتىماقتاستىقتى جۇزەگە اسىردى. ىنتىماقتاستىقتىڭ نەگىزگى باعىتتارى - ستۋدەنتتەرمەن، وقىتۋشىلارمەن جانە عالىمدارمەن اكادەميالىق الماسۋ، بىرلەسكەن عىلىمي جوبالار مەن اكادەميالىق باعدارلامالاردى ىسكە اسىرۋ.

«قازىرگى كەزدە ەلىمىزدەگى 90 نان استام جوعارى وقۋ ورنى 1500 گە جۋىق بىرلەسكەن عىلىمي جوبانى، 181 قوس ديپلوم باعدارلاماسىن (ءبىلىم الۋشىلار سانى 1380 ادام) جانە 62 بىرلەسكەن ءبىلىم بەرۋ باعدارلاماسىن (ءبىلىم الۋشىلار سانى 1251 ادام) ىسكە اسىرىپ جاتىر»، - دەدى مينيستر.