اسكەرگە بارۋدان جالتارعان 200 بوزبالا رەسەيگە قاشىپ كەتكەن

استانا. قازاقپارات – ق ر باس اسكەري پروكۋرورىنىڭ ءبىرىنشى ورىنباسارى ماقسات قازيەۆ اسكەردەن جالتارىپ، رەسەيگە كەتىپ قالعان جاستارعا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

بۇگىن سەناتتا اسكەري قىزمەتشىلەردىڭ دەنساۋلىعىن تالقىلاۋ كەزىندە دەپۋتات سەرگەي ەرشوۆ اسكەردەن جالتارعاندار تۋرالى سۇرادى.

«بۇقارالىق اقپارات قۇرالدارىندا اسكەرگە بارماۋ ءۇشىن سولتۇستىك قازاقستاننان رەسەيگە قاشىپ بارعاندار تۋرالى مالىمەت تارادى. ماسەلەن، قازىرگى كەزدە كورشى مەملەكەتتىڭ اۋماعىندا كوكتەمگى اسكەرگە شاقىرىلاتىن 250 گە جۋىق ازامات بار. شىنىمەن دە جاعداي وسىلاي ما؟ بۇل جىگىتتەردىڭ تاعدىرى نە بولادى؟» دەپ سۇرادى سەناتور.

ءوز كەزەگىندە باس اسكەري پروكۋروردىڭ ءبىرىنشى ورىنباسارى ماقسات قازيەۆ وسىنداي دەرەكتەر بار ەكەنىن ناقتىلادى.

«راسىندا دا مۇنداي اقپارات ب ا ق- تا جاريالانعان. پروكۋراتۋرا ورگاندارى قورعانىس مينيسترلىگىنە ءتيىستى نۇسقاۋ بەردى. 200 ادامنىڭ 120 سى رەسەي فەدەراتسياسىندا ءبىلىم الىپ جاتىر، ياعني ستۋدەنت ساناتىنا جاتادى»، - دەدى س. قازيەۆ.

وسى ورايدا ول قورعانىس مينيسترلىگى بۇل باعىتتا ءتيىستى ءىس-قيمىلدى پىسىقتاپ جاتقانىن ايتتى.

«ەگەر ولار شىنىمەن كورشى ەلدە وقۋدا جۇرگەنى ناقتىلانسا، وندا بۇل جاعداي اسكەرگە بارۋ مەرزىمىن كەيىنگە شەگەرۋگە سەبەپ بولادى. سونداي-اق، بۇل جىگىتتەردىڭ اراسىندا وقۋعا تۇسپەگەندەرى انىقتالسا، قازاقستان اۋماعىنا كەلگەن كەزدە ولار مىندەتىنەن جالتارعانى ءۇشىن ايىپتالادى»، - دەدى باس اسكەري پروكۋروردىڭ ءبىرىنشى ورىنباسارى.