استانادا 200 گە تارتا دۇكەن ويىنا كەلگەن باعانى قويعان
بۇل تۋرالى ەلوردا اكىمىنىڭ ورىنباسارى ەرلان بەكمىرزايەۆ تا ايتتى، - دەپ حابارلايدى قازاقپارات ءتىلشىسى..
«جىل باسىنان بەرى ءبىزدىڭ مونيتورينگتىك توپتار 500 گە جۋىق دۇكەندى ارالاپ شىعىپ ۇلگەردى، ونىڭ ىشىندە 198 دۇكەن ازىق-تۇلىك تاۋارلارىن بەلگىلەنگەن باعاسىنان اسىرا ساۋدالاعان. «ساۋدا تۋرالى» زاڭ بار، وندا الەۋمەتتىك ماڭىزى بار تاۋارلارعا ۇستەمە 15 پايىزدان اسپاۋى كەرەكتىگى انىق جازىلعان»، - دەدى ەرلان بەكمىرزايەۆ.
ول كوپتەگەن ساۋدا جەلىلەرىمەن باعانى وسى دەڭگەيدەن اسىرماۋ تۋرالى مەموراندۋمعا قول قويىلعانىن دا ەسكە سالدى.
«وكىنىشكە قاراي، مەموراندۋمعا قالانىڭ بارلىق ساۋدا جەلىلەرى قول قويعان جوق. ءبىز بۇل جەردە بارلىق تاۋار تۋرالى ايتىپ وتىرعان جوقپىز. باعانى كوتەرمەۋ الەۋمەتتىك ماڭىزى بار 19 اتاۋلى ازىق-تۇلىككە قاتىستى. سوندىقتان دا شاعىن بيزنەستى، ءۇي جانىنداعى دۇكەن يەلەرىن الەۋمەتتىك ماڭىزى بار تاۋارلاردىڭ باعاسىن ۇستاپ تۇرۋعا جانە باعانى قولدان وسىرمەۋگە شاقىرامىز. ال زاڭنان اتتاعان ساۋدا نۇكتەسى يەلەرىنە شارا قولدانىلادى»، - دەپ قوستى ەرلان بەكمىرزايەۆ.
ايتا كەتەيىك، قاڭتار ايىندا ەلدە جىلدىق ينفلياتسيا %20,7 بولسا، ونىڭ ەڭ جوعارى ءمانى استانا قالاسىندا تىركەلگەن. قالادا قاڭتاردا ازىق- تۇلىك تاۋارلارىنىڭ باعاسى %25,7 عا وسكەن بولاتىن. ازىق- تۇلىككە جاتپايتىن تاۋارلار باعاسىنىڭ ءوسۋ قارقىنى دا %32 عا جۋىقتاعان.
