بەس مىڭ باس تۇيەسى بار كاسىپكەر 200 ادامدى جۇمىسپەن قامتىپ وتىر

نۇر-سۇلتان. قازاقپارات - سىدىق داۋلەت ءوز كاسىبىن وسىدان 21 جىل بۇرىن جالعىز تۇيەنىڭ شۇباتىن ساتۋدان باستاعان.

ەرىنبەي ەڭبەك ەتىپ، تاپقان پايداسىنا 50 بوتا ساتىپ الادى. ال قازىر ونىڭ شارۋاشىلىعىندا 5 مىڭ باس تۇيە بار، دەپ حابارلايدى «حابار 24».

مۇندا 200 ادام ەڭبەك ەتەدى. جالاقىلارىن ۋاقىتىلى الىپ تۇرادى. مىڭ جارىم باس تۇيە كۇنىنە ەكى رەت ساۋىلادى.

سىدىق داۋلەت، فەرمەر:

- ەكى جىلدان بەرى وسىنداي ساۋىن ماشيناسىمەن ساۋامىز. ءبىر ساۋعاندا 4-5 ليتر تۇيە ءسۇتىن ساۋامىز. كۇنىگە ەكى مەزگىل ساۋامىز. سوندا ورتاشا ەسەپپەن 10 ليتر ءسۇت ساۋىلادى ءار تۇيەدە.

گۇلجامال اۋەزمۇراتوۆا، تۇيە شارۋاشىلىعىنىڭ جۇمىسشىسى:

- قانشا جىلدان بەرى قولمەن ساۋاتىن ەدىك. جيىرما جىل قولمەن ساۋىلدى، ەندى ەكى- ءۇش جىلدان بەرى توكپەنەن ساۋىلىپ جاتىر ، بىزگە دە ىڭعايلى دويكامەن ساۋىلعان.

نەگىزگى ءونىم - تۇيەنىڭ شۇباتى. 2009 -جىلى فەرمەر شۇبات جاسايتىن زاۋىت اشادى. ال بىلتىر قۇرعاق تۇيە ءسۇتىن شىعاراتىن كاسىپورىن ىسكە قوسىلدى. قۇرعات ءسۇتتى ساقتاۋ ءارى تاسىمالداۋ وڭاي. يزرايلدىك تەحنولوگيانىڭ ارقاسىندا پايدالى قاسيەتتەرى سول كۇيى ساقتالادى. قازىر ەمدىك قاسيەتى مول ءونىم رەسپۋبليكادان بولەك، شەتەلگە دە ساتىلىپ جاتىر.

سىدىق داۋلەت، فەرمەر:

- ەكى جىلداي بولدى كورشى قىتاي مەملەكەتىنە سونىڭ % 50-60 - ىن ەكسپورتتايمىز. ونىڭ ىشىندە ۇلكەن قالالارى پەكينگە، شاڭحايعا ەكسپورتتايمىز. جاقىندا دۋبايمەنەن كەلىسىمشارتقا وتىردىق. گەرمانيادان، ەۋروپادان كوپتەگەن قىزىعۋشىلىق تانىتىپ جاتىر، سوندىقتان ەۋرووداققا شىعارساق پا دەپ جۇمىس جاساپ جاتىرمىز.

تۇيە ءسۇتىنىڭ ەمدىك قاسيەتتەرىن اتا- بابامىز ەجەلدەن بىلگەن. ول ادامنىڭ يممۋنيتەتىن كۇشەيتەدى. ال جۋىردا قىتايلىق عالىمدار تۇيە اعزاسىندا ءارتۇرلى اۋرۋلاردى انىقتاپ، ەمدەۋگە كومەكتەسەتىن انتيدەنەلەردى تاپقان. تۇيەنىڭ يممۋنيتەتى مينۋت سايىن وزگەرىپ تۇرادى ەكەن. اتا- اجەلەرىمىز تۇيە ءسۇتىن اسقازان، تۋبەركۋلەز بەن ونكولوگيالىق اۋرۋلارعا قارسى قولدانىپ تۇرعان.

سىدىق داۋلەت، فەرمەر:

- قازىر 5000 تۇيە ۇستاپ وتىرعان بولساق، الداعى ەكى- ءۇش جىلدا ەكسپورتتىڭ ارقاسىندا 15 مىڭعا جەتكىزەمىز دەپ جۇمىس جاساپ جاتىرمىز.

اتا كاسىپتەن ءناسىبىن تاپقان سىدىق داۋلەت مال سانى ارتقان سوڭ ارنايى كلاستەر قۇرۋدى جوسپارلاپ وتىر. تۇيە ەتى مەن ءجۇنىن وڭدەيتىن زاۆود سالىنادى. «ماقسات ايقىن بولسا، تابىسقا جەتۋ دە جەڭىل بولادى»، - دەيدى فەرمەر.

www.24.kz