بيىل ەل استاناسىنا 200 مىڭنان استام شەتەلدىك تۋريست كەلۋى مۇمكىن

«بيىل بۇكىل شەكارا اشىلادى - قۇرلىقتىق شەكارا دا، اۋە شەكاراسى دا. ۆيزاسىز رەجيم بويىنشا دا شەكتەۋلەر الىنىپ تاستالدى. قازىر 73 باعىتتاعى مەملەكەت بويىنشا ۆيزاسىز ساپارعا جول اشىق. وسىعان بايلانىستى بىزگە تۋريستەردى تارتۋ جۇمىسىن جانداندىرۋ كەرەك. ونىڭ ۇستىنە، وزدەرىڭىز بىلەتىندەي، تۋريزمدى دامىتۋعا ارنالعان ۇلتتىق جوبا قابىلداندى. سونىڭ اياسىندا نۇر-سۇلتان قالاسى بويىنشا ءبىرقاتار ماقسات قويىلعان. ناقتىراق ايتساق، ەل ىشىنەن ەلورداعا قاتىنايتىن تۋريستەردىڭ دە، وزگە مەملەكەتتەردەن كەلەتىن تۋريستەردىڭ دە سانىن كوبەيتۋ قاجەت. پاندەميا كەزىندە ىشكى تۋريستەردىڭ سانى ارتقانىن كوردىك. جالپى قازاقستاندىقتاردىڭ تۋريستىك وبەكتەرگە دەگەن قىزعۋشىلىعى ارتتى. شەتەلدەن كەلەتىن تۋريستەر تۋرالى ايتساق، وكىنىشكە قاراي، ولاردىڭ سانى كەمىدى. 1 جىلدا نۇر-سۇلتانعا شامامەن 78 مىڭ تۋريست كەلگەن. ۇلتتىق جوبا بويىنشا، بيىل 263 مىڭ شەتەلدىك تۋريست تارتۋ جوسپارلانعان»، - دەدى باسقارما باسشىسى قالالىق ءماسليحاتتىڭ تۇراقتى كوميسسيا وتىرىسىندا.
سونداي-اق، ول قالا ىشىندە تۋريستەر تاسىمالدايتىن قوسقاباتتى اۆتوبۋستار ءالى دە قىزمەت كورسەتەتىنىن اتاپ ءوتتى.
«بۇرىن 3 اۆتوبۋس بار ەدى. پاندەميا كەزىندە ونىڭ بىرەۋى اقتاۋعا جىبەرىلدى. ول جاقتا دا تۋريزم دامىپ كەلەدى. سوندا بيىل ەكى اۆتوبۋس تۋريست تاسىمالدايدى. بۇل شاراعا 5 ميلليون 600 مىڭ تەڭگە قاراستىرىلعان»، - دەدى ەرجان بالتايەۆ.
Kazakh Tourism- ءنىڭ مالىمەتى بويىنشا، ەلدە ىشكى تۋريزمگە سۇرانىستىڭ ارتۋىنا بايلانىستى قوناق ۇيلەر مەن دەمالىس ورىندارى قىزمەتى %90 عا ارتقان.