«ەلوردا جاستارى»: بيىل 200 استانالىق جاس ازامات باسپانالى بولادى
«ەلوردا جاستارى» تۇرعىن ءۇي باعدارلاماسى ءبىزدىڭ بانك پەن قالا اكىمدىگىنىڭ بىرلەسكەن جوباسى. باعدارلاماعا 35 جاسقا دەيىنگى ازاماتتار قاتىسا الادى. جانە باسىمدىق جاس وتباسىلارعا بەرىلەدى. ونىڭ ىشىندە الەۋمەتتىك سالا قىزمەتكەرلەرى، پەداگوگتەر، دارىگەرلەر، پوليسەيلەر، ءورت سوندىرۋشىلەر جانە تاعى باسقا. اتالعان سالا ماماندارىنىڭ قوعامنىڭ دامۋى مەن قالانىڭ كۇندەلىكتى تىرشىلىگىندە الاتىن ورنى ەرەكشە. ولاردىڭ تابىسى جوعارى ەمەس، سوندىقتان وسى ساناتتاعى ماماندارعا ءمان بەرىلىپ وتىر»، - دەدى ءلاززات يبراگيموۆا Baigenews.kz اقپارات اگەنتتىگى جوباسىنىڭ تىكەلەي ەفيرىندە.
ونىڭ ايتۋىنشا، اتالعان باعدارلامامەن باسپانالى بولعىسى كەلگەن استانالىق 10 پايىز العاشقى جارنا تولەيدى. جانە ءوتىنىم ماقۇلدانعان جاعدايدا قاتىسۋشىعا 18 ملن تەڭگەگە دەيىن نەسيە بەرىلەدى.
«باعدارلاماعا قاتىسۋشى 18 ميلليون تەڭگەنىڭ ۇستىنە ءوز جيعانىن قوسىپ پاتەر ساتىپ الۋىنا بولادى. جانە جاڭا باسپانامەن قاتار قولدانىستاعى پاتەردى ساتىپ الۋ قۇقىعى دا بەرىلمەك. بيىل قولعا الىنعان «ەلوردا جاستارى» تۇرعىن ءۇي باعدارلاماسىنىڭ بيۋدجەتى 3,6 ميلليارد تەڭگە. اتالعان سوما جىل سوڭىنا بايقاۋ شارتىنا سايكەس كەلگەن 200 استانالىق جاس ازاماتقا تابىس ەتىلەدى.
الداعى ۋاقىتتا بۇل باعدارلاما جالعاسىن تاۋىپ، اياسى كەڭەيە تۇسەدى دەگەن ويدامىن. ءبىز بۇعان دەيىن وسى جوبانى الماتىدا جۇزەگە اسىردىق. العاشقى جىلى 100-200 پاتەردەن باستاساق، بيىل ول كورسەتكىش 1 مىڭ پاتەرگە دەيىن جەتتى»، - دەيدى ول.