الماتى- وسكەمەن تاسجولىنىڭ 200 شاقىرىمى اشىلادى
وڭىردە كولىك جولدارىن جوندەۋ جۇمىستارى جالعاسۋدا. قازىرگى ۋاقىتتا جاقسى جانە قاناعاتتانارلىق جاعدايداعى جولداردىڭ ۇلەسى 85 پايىزعا جەتكەن. بۇل تۋرالى حالىق الدىندا ەسەپ بەرگەن ش ق و اكىمى دانيال احمەتوۆ ايتتى.
«45,3 ميلليارد تەڭگە رەسپۋبليكالىق ماڭىزى بار جولدارعا، اتاپ ايتقاندا «تالدىقورعان- قالباتاۋ- وسكەمەن» جانە «قالباتاۋ- مايقاپشاعاي» جولدارىن، وبلىستىق جانە اۋداندىق ماڭىزى بار جولدارعا ءبولىندى. ال ەلدى مەكەندەر كوشەلەرىن جوندەۋگە 40,7 ميلليارد تەڭگەدەن استام ينۆەستيتسيا تارتىلعان. بيىل رەسپۋبليكالىق ماڭىزى بار جولداردى رەكونسترۋكتسيالاۋ جۇمىستارى جالعاسۋدا»، - دەدى ول.
2021 -جىلى «الماتى- وسكەمەن» جانە «قالباتاۋ- مايقاپشاعاي» تاسجولىنىڭ 200 شاقىرىمىندا جول قوزعالىسى اشىلادى. اتالعان جولدار تولىقتاي 2022 -جىلى پايدالانۋعا بەرىلمەك، - دەپ اتاپ ءوتتى دانيال احمەتوۆ.
«بۇدان بولەك، «تاسكەسكەن- باقتى» تاسجولىنىڭ 20 شاقىرىمىن رەكونسترۋكسيالاۋ اياقتالۋدا. جوبا ىسكە اسقاننان كەيىن وسينوۆ اسۋىن اينالىپ ءوتىپ، «وسكەمەن- التاي- راحمان قاينارى» جولىن قايتا جاڭارتۋ جۇمىستارى جالعاستىرىلادى»، - دەدى دانيال احمەتوۆ.
وسى جىلى وبلىستىق جانە اۋداندىق ماڭىزى بار جولداردىڭ 138 شاقىرىمىن جوندەۋ جۇمىستارى جالعاسىن تاپپاق. سونداي- اق وسكەمەن قالاسى مەن ءۇرجار اۋىلىنىڭ اۋەجايلارىن قايتا جاڭارتۋ، كۇرشىم اۋدانىنداعى بۇقتىرما سۋ قويماسى ارقىلى كوپىر سالۋ جۇمىستارى جۇرگىزىلەدى.
اۆتور: تالعاتجان مۇحامەتبەك ۇلى