الماتىعا جاڭا ۇلگىدەگى اۆتوبۋستان تاعى 200 ى اكەلىندى
قالا باسشىسى باۋىرجان بايبەك جۇمىس ساپارى كەزىندە قالاعا اكەلىنگەن جاڭا اۆتوبۋستاردى كوردى.
شاھاردا كولىك رەفورماسىن جۇزەگە اسىرۋ اياسىندا جولاۋشىلار كولىگىن جاڭارتۋ جۇمىستارى جالعاسىپ كەلەدى. سىيىمدىلىعى ۇلكەن جاڭا اۆتوبۋستار №48 باعىت بويىنشا جۇرەدى. سونىمەن قاتار № 12، 19، 56، 70، 77، 123، 124، 137 باعىتتارىنا ەنگىزىلەدى.
ەرتەڭنەن باستاپ № 36، 51، 125 باعىتتاعى ەسكى گازەلدەردىڭ ورنىنا جاڭا اۆتوبۋستار شىعادى. مۇمكىندىگى شەكتەۋلى جاندارعا قولايلى اۆتوبۋستار تار كوشەلەرمەن جۇرە الادى. № 40، 46،122-باعىتتار دا كۇشەيتىلەدى.
بۇدان وزگە № 59، 69، 71 -باعىتتاردا جىلجىمالى قۇرام تولىق جاڭارادى. № 8، 44، 74 -باعىتتار بويىنشا قوسىمشا اۆتوبۋستار شىعادى.
№205 -باعىت بويىنشا جاڭا ماگيسترالدى قوزعالىس اشىلادى. ول رايىمبەك داڭعىلى بويىمەن «بارلىق» بازارىنان قالانىڭ باتىس جاعىن جانە «جەتىسۋ» بازارىنىڭ شىعىس جاعىن قوسادى. بۇل باعىت بويىنشا جولاۋشىلارعا 20 جاڭا اۆتوبۋس قىزمەت كورسەتەدى.
الماتى اگلومەراتسياسى بويىنشا جولاۋشىلاردى تاسىمالداۋ ساپاسىن ارتتىرۋ ءۇشىن قاسكەلەڭ قالاسىنا قاتىنايتىن ۇزىندىعى 12 مەترلىك اۆتوبۋستار جۇرەتىن جاڭا باعىت اشۋ جوسپارلانىپ وتىر.
الماتى اكىمى باۋىرجان بايبەك قازىرگى كەزدە كولىك سالاسىندا اشىق نارىقتىق مەحانيزمدەردىڭ جۇمىس ىستەي باستاعانىن اتاپ ءوتتى.
جىلجىمالى قۇرامدى جاڭارتۋ، ارنايى جولاقتار اشۋ ارقاسىندا جولاۋشىلار اعىنى ارتىپ كەلەدى.
«ەسكى ءارى ءتۇتىن شىعاراتىن اۆتوبۋستار قالادا جۇرمەۋى كەرەك. ەگەر كورسەتىلگەن قولداۋعا قاراماستان جەكە تاسىمالداۋشى جىلجىمالى سوستاۆتى جاڭالاماسا، وندا ولارمەن كەلىسىم بۇزىلادى. جاڭا تەحنولوگيالاردى ەنگىزىپ، بولاشاقتا ءبىر كولىكتەن ەكىنشىسىنە تەگىن اۋىسۋدى قاراستىرعان ءجون. جولاۋشىلاردىڭ كولىك جۇمىسىنا قاناعاتتانۋى - تاسىمالداۋدىڭ باستى كريتەرييى. جەكە كولىكتى قازىرگى دەڭگەيدە ۇستاپ تۇرۋ ءۇشىن لايىقتى بالاما ۇسىنۋ قاجەت»، - دەدى قالا باسشىسى.
ايتا كەتۋ كەرەك، قالاعا جاڭادان كەلگەن تومەن ەدەندى لياز ماركالى اۆتوبۋستار كونديتسيونەرلەرمەن، ۆيدەوباقىلاۋ كامەرالارىمەن جابدىقتالعان. كولىكتەر ەۆرو-5 ەكولوگيالىق ستاندارتىنا ساي. جىلجىمالى سوستاۆتىڭ دايىندىعىنا وراي باعىتتارعا شىعۋمەن كەزەڭمەن اتقارىلادى.
الماتىدا جىل اياعىنا دەيىن جاڭا قوعامدىق كولىكتىڭ ۇلەسى %87- عا دەيىن جەتەتىن بولادى.
