11:12, 01 - ماۋسىم 2018 | GMT +5
قىتايلىق ەرلى-زايىپتىلار شولدە 200 مىڭ اعاش ءوسىردى
استانا. قازاقپارات - قىتايلىق ايەل جاڭ ليانليان كۇيەۋى ەكەۋى شاڭى بۇرقىراعان شولەيتتى نۋ ورمانعا اينالدىردى، دەپ جازادى شينحۋا اگەنتتىگى.
قىتايدىڭ سولتۇستىك- باتىس بولىگىنە ورىن تەپكەن شانشي پروۆينسياسىنىڭ يانان قالالىق وكرۋگىندەگى انساي اۋدانىنا قاراستى لەيپينتا قىستاعىندا نۋلى ورمان جايقالىپ تۇر. ول - ەرلى-زايىپتىلار ۆاڭ ياوۋ مەن جاڭ ليانلياننىڭ وتىز جىلدىق ەڭبەگىنىڭ جەمىسى.
1981 -جىلى قىستاق ماڭىنان قۇمدى داۋىل كوتەرىلۋىنەن مەزى بولعان جاڭ ليانليان كۇيەۋىن اعاش وتىرعىزۋعا كوندىرەدى. سودان بەرى ەرلى-زايىپتىلار 130 گەكتار جەردە 200 مىڭنان استام اعاش ءوسىردى. ورمان ەلدى مەكەننىڭ كليماتىنا دا ىقپال ەتىپ، تۇرعىنداردىڭ ءومىرىن تۇبەگەيلى وزگەرتتى.
