قازاقستاندا 200 دەن اسا ءۇندىستاندىق كومپانيا جۇمىس ىستەيدى
«بۇگىنگى كۇنى اتىراۋ وبلىسىنىڭ ۇندىستانمەن تاۋار اينالىمى 547 ميلليون دوللاردى قۇرايدى. وڭىردە ءۇندىستاندىق كاپيتالدىڭ قاتىسۋىمەن 20 كومپانيا جۇمىس جاسايدى. قازاقستان پرەزيدەنتى نۇرسۇلتان نازاربايەۆ ەل ەكونوميكاسىنىڭ بارلىق سالالارىنا ينۆەستيتسيالار تارتۋعا ۇلكەن كوڭىل بولۋدە. وسى فاكتوردى ەسكەرە وتىرىپ، بىزدە شەتەلدىك ينۆەستورلاردىڭ كاپيتال سالۋىن ۇلعايتۋ ءۇشىن بارلىق مۇمكىندىكتەر بار»، - دەدى نۇرلان نوعايەۆ.
وبلىس اكىمى ينۆەستورلاردىڭ ءوڭىردىڭ قولايلى ينۆەستيتسيالىق احۋالىنا نازار اۋداراتىنىن جانە جەرگىلىكتى اتقارۋشى ورگاندار كومپانيالارعا بىرلەسكەن وندىرىستەردى دامىتۋ ءۇشىن مەيلىنشە قولايلى جاعدايلار جاساۋعا دايىن ەكەنىن اتاپ كورسەتتى.
ءوز كەزەگىندە ءۇندىستان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى اتىراۋعا كەلەردىڭ الدىندا الماتى مەن شىمكەنتتە بولعانىن ايتىپ ءوتتى.
«مەنىڭ مىندەتىم ەكى ەلدىڭ اراسىنداعى قولايلى قارىم-قاتىناستى دامىتۋ. ەكونوميكالىق ىنتىماقتاستىقتىڭ دا ماڭىزى زور. قازاقستاندا ءبىزدىڭ ەلىمىزدىڭ بيزنەسىنىڭ قاتىسۋىمەن 200 دەن اسا كومپانيا جۇمىس جاسايدى. ءبىزدىڭ ساپارىمىزدىڭ باعدارلاماسىنا قازاقستاندىق تاراپتىڭ دا، ءۇندىستاندىق تاراپتىڭ دا الەۋەتتى ينۆەستورلارىمەن كەزدەسۋ ەنگىزىلگەن»، - دەپ اتاپ ءوتتى پرابحات كۋمار.
