قازىلار القاسىن «پاۆلودار ارۋى» ابايدىڭ 200 ولەڭىن وقىپ تاڭقالدىردى
سۇلۋلىق بايقاۋىندا پاۆلودار مەملەكەتتىك پەداگوگيكالىق ينستيتۋتى فيلولوگيا فاكۋلتەتىنىڭ ستۋدەنتى ءسانيا تەمىرحانوۆا جەڭىسكە جەتتى. ول ۇلى ابايدىڭ 200 ولەڭىن وقىپ، كورەرمەندەر مەن قازىلار القاسىنىڭ جۇرەگىن جاۋلادى، دەپ ايتتى ۇيىمداستىرۋشىلار - پاۆلودار وبلىستىق جاستار ساياساتى ماسەلەلەرى باسقارماسىندا.
ءسانيا پوەزياعا قۇشتارلىعىن وزگەشە فورمادا كورسەتتى: اقىننىڭ ولەڭدەر جيناعى كورەرمەندەرگە تاراتىلىپ، ءاربىر قوناق كەز كەلگەن بەتتى اشىپ، ولەڭنىڭ العاشقى جولىن وقىدى. ءسانيا بولسا، سول ولەڭدى تولىعىمەن مانەرلەپ جاتقا ايتىپ بەردى. ال كونكۋرسقا ون بويجەتكەن قاتىستى.
«دارىندىلار كونكۋرسىندا ءار قاتىسۋشى ءوز قابىلەتىن پاش ەتۋگە تىرىستى، - دەدى وبلىستىق جاستار ساياساتى ماسەلەلەرى باسقارماسىنىڭ باسپا ءسوز حاتشىسى گاينەل ماشراپوۆا. - قىزداردىڭ شەبەرلىگىندە ءسوز جوق».
قازىلار القاسىنىڭ قۇرامىنا س. تورايعىروۆ اتىنداعى پاۆلودار مەملەكەتتىك ۋنيۆەرسيتەتى PR- ستراتەگيالار مەن كورپوراتيۆتىك كوممۋنيكاتسيالار ديرەكتورى رۋسلان ءبىلالوۆ، ج. ايماۋىتوۆ اتىنداعى قازاق مۋزىكالىق دراما تەاترىنىڭ ديرەكتورى مۇحتار بايجۇمانوۆ، ي. بايزاقوۆ اتىنداعى پاۆلودار وبلىستىق فيلارمونياسىنىڭ ديريجيەرى تالعات كارىموۆ، جاستار ساياساتى ماسەلەلەرى باسقارماسىنىڭ ءبولىم باسشىسى داۋرەن ءابدىراحمانوۆ پەن قازىلار القاسىنىڭ ءتورايىمى رايسا رايىمبەكوۆا كىردى.
