قازاقستاندىق اگرارشىلارعا 200 مىڭعا جۋىق تراكتور كەرەك
«ەگەر تاريحقا ۇڭىلسەك، 1990 -جىلى قازاقستاندا شامامەن 230 مىڭ تراكتور بولعان ەدى. تراكتورلاردىڭ سانى ودان بەرى 80 مىڭعا كەمىپ، بۇگىنگى كۇنى 150 مىڭ دانانى عانا قۇراپ وتىر. وسى 150 مىڭنىڭ 120 مىڭى ەسكىرىپ كەتتى. دەمەك، تراكتورلاردىڭ 30 مىڭى عانا قولدانۋعا جارامدى دەپ ايتۋعا بولادى. مەنىڭشە، قازاقستانداعى شارۋالارعا شامامەن 200 مىڭ تراكتور كەرەك. ال ونى ساتىپ الۋ ءۇشىن كىم اقشا بەرەدى؟ ءبىزدىڭ شارۋا قوجالىقتاردىڭ جىلىنا 1000 عانا تراكتور ساتىپ الۋعا مۇمكىندىگى بار. كومباين جانە وزگە دە تەحنيكالار بويىنشا جاعداي وسىنداي»، - دەيدى ەسىركەپ ءابدىراحمانوۆ.
ەسىركەپ ءابدىراحمانوۆ ءوز سوزىندە قازاقستاندا اۋىل شارۋاشىلىعى جانە قوسالقى تەحنيكالاردى قۇراستىرۋمەن اينالىساتىن 120 كاسىپورىننىڭ بارىن العا تارتادى. بۇل تۇرعىدا وزگە قۇراستىرۋشىلاردان وق بويى وزىق تۇرعان 5-6 كاسىپورىن بار. ولار جالپى تەحنيكانىڭ 20 پايىزىن وندىرەدى. «اۋىل شارۋاشىلىعى مينيسترلىگى وسى سالاداعى كاسىپورىندارعا وتاندىق تەحنيكالاردى ساتىپ العان جاعدايدا ايتارلىقتاي جەڭىلدىك ۇسىنادى. بۇعان قوسا مينيسترلىك اۋىل شارۋاشىلىعى تەحنيكالارىن قۇراستىراتىن كاسىپورىنداردى جاڭارتۋ ءۇشىن قاراجات بولمەك»، - دەيدى ول.
ەسكە سالا كەتسەك، بۇگىن استانادا «اگرارلىق نەسيە كورپوراتسياسى» ا ، «ق ر كرەديتتىك سەرىكتەستەرىنىڭ قاۋىمداستىعى» زاڭدى تۇلعالار بىرلەستىگى، ليزينگ كومپانيالاردىڭ قاۋىمداستىعى مەن «قازاقستان ماشينا جاساۋشىلارىنىڭ وداعى» ز ت ب باسشىلارى فەرمەرلەر ءۇشىن قوسالقى اۋىل شارۋاشىلىعى تەحنيكالارىن ءتيىمدى شارتتارمەن ساتىپ الۋعا باعىتتالعان ءتورت جاقتى كەلىسىمگە قول قويعان بولاتىن. كەلىسىم بويىنشا قوسالقى تەحنيكالاردى ساتىپ الۋ ءۇشىن شارۋالارعا 5 ميلليارد تەڭگە ءبولىنىپ وتىر. ولاردىڭ 1,8 ميلليارد تەڭگەسى نەسيەلىك سەرىكتەستىكتەر، 3,2 ميلليارد تەڭگەسى ليزينگتىك كومپانيالار ارقىلى بەرىلمەك.
اۆتور: ايان بەكەن ۇلى
