يسەكەشيەۆ 200 مىڭ تەڭگەگە ساتىلعان ات سپورتى كلۋبىن پروكۋرورلىق تەكسەرىستەن وتكىزۋدى تاپسىردى

استانا. قازاقپارات - استانا قالاسىنىڭ اكىمى اسەت يسەكەشيەۆ كوممۋنالدىق مۇلىك نىساندارىن باسەكەلەستىك ورتاعا بەرۋ ماسەلەلەرى بويىنشا كەڭەس وتكىزدى.

وعان مەملەكەتتىك كوممۋنالدىق قازىناشىلىق كاسىپورىندارىن اۋكسيون ارقىلى ساتۋ ماسەلەسى سەبەپ بولدى، دەپ حابارلايدى قازاقپارات قالا باسشىسىنىڭ باسپا ءسوز قىزمەتىنە سىلتەمە جاساپ.

اسەت يسەكەشيەۆ نىسانداردىڭ الەۋمەتتىك ماڭىزدىلىعىن ەسكەرە وتىرىپ، الەۋمەتتىك بۇل ماسەلەنى مۇقيات پىسىقتاۋدى، قۇقىقتىق باعا بەرۋ ءۇشىن ساۋدا بويىنشا ماتەريالداردى قالالىق پروكۋراتۋراعا جىبەرۋدى، سونداي- اق، قالا اكىمدىگىنىڭ ءتيىستى باسقارمالارىنا بارلىق جەكەشەلەندىرۋ نىساندارى بويىنشا تولىق اقپاراتتى جاريا ەتۋدى، الداعى ۋاقىتتا جوسپارلانعان ساۋدالار تۋرالى اقپاراتتى كەڭىنەن تاراتۋدى تاپسىردى.

 قالا اكىمىنىڭ تاپسىرماسى بويىنشا، بۇگىن ساعات 16.00-دە اكىم ورىنباسارى اندرەي لۋكين ارنايى باسپا ءسوز ءماسليحاتىن وتكىزەدى.

 بۇعان دەيىن حابارلاعانىمىزداي، «استانا» كوكپار كلۋبى» مەملەكەتتىك كوممۋنالدىق- قازىنالىق كاسىپورنىنىڭ اۋكسيون ارقىلى جەكەمەنشىككە ساتىلدى. گوللانديالىق ادىسپەن ساۋدا- ساتتىقا سالىنعان كلۋبتىڭ مەنشىگىندە اسىل تۇقىمدى 11 ات، قىزمەتتىك كولىكتەر، ينفراقۇرىلىم، تۇرعىن- جايلار مەن ات ابزەلدەرى بولعان. سونىڭ بارلىعىن «قۇپيا ادام» بار بولعانى 200 اق مىڭ تەڭگەگە ساتىپ الىپتى. تاڭعالارلىق اۋكسيوننىڭ وتكەنىن ءتىپتى كلۋب باسشىلىعى دا بىلمەي قالعان. اتالعان نىساننىڭ الەۋمەتتىك ماڭىزدىلىعى سول، ونىڭ جانىندا ات ونەرىنە ۇيرەنەتىن مەكتەپ بولعان. وندا 140 قا جۋىق بالا ءدارىس الىپ ءجۇردى. وسى ۋاقىتقا دەيىن مەكتەپتىڭ قول جەتكىزگەن جەتىستىكتەرى دە از ەمەس.

«استاناداعى كوممۋنالدىق مۇلىك پەن مەملەكەتتىك ساتىپ الۋلار باسقارماسى ات سپورتى كلۋبىن اۋكسيونعا سالىپ، ساتىپ جىبەرىپتى. ءۇش اۋكسيون وتكەن. ءۇشىنشىسىن گوللانديالىق ادىسپەن، ياعني باعانى تومەندەتۋ ارقىلى  198700 تەڭگەگە بەلگىسىز بىرەۋگە ساتا سالىپتى. سوندا ءبىر اتتى 20 مىڭ تەڭگەدەن باعالاعان ەكەن. ال نەگىزىندە ول اسىل تۇقىمدى اتتاردىڭ نارىقتاعى باعاسى ءجۇز ەسە قىمبات. بىرەۋى 5 مىڭ دوللار تۇرادى. اتى تۇرماق ءبىر ەرتوقىمنىڭ ءوزى 350 مىڭ تەڭگە بولاتىن. مۇنىڭ سىرتىندا قىزمەتتىك كولىكتەر سياقتى مۇلىكتەر تاعى بار»، - دەيدى «تۇلپار» يپپودرومى ديرەكتورىنىڭ ورىنباسارى بولات شالابايەۆ «قازاقپاراتقا» بەرگەن سۇحباتىندا.

 ارمان اسقاروۆ