قىتايلىق ميللياردەر دجەك ما :بولاشاقتا ادام 200 جىلدان ارتىق ءومىر سۇرمەۋى ءتيىس دەگەن زاڭ شىعۋى مۇمكىن
بۇل تۋرالى بۇگىن استانا ەكونوميكالىق فورۋمىنىڭ پلەنارلىق وتىرىسىندا Alibaba Group كومپانياسىنىڭ نەگىزىن قالاۋشى جانە ديرەكتورلار كەڭەسىنىڭ ءتوراعاسى دجەك ما ءمالىم ەتتى.
«مەنىڭ ويىمشا، قولدانىستاعى تەحنولوگيالاردىڭ مۇمكىندىگىمەن الداعى 30-40 جىلدا ادام ءوزىنىڭ اعزاسىنىڭ كودىن تولىقتاي اشىپ، ماڭگىلىك ءومىردىڭ ءدارى-دارمەگىن ويلاپ تابادى. ادامزات ءومىرى ۇزارىپ، قاتەرلى ىسىك پروبلەمالارىن شەشە الادى. وسى رەتتە بولاشاقتا بىردە- ءبىر ادام 200 جىلدان ارتىق ءومىر سۇرمەۋى ءتيىس دەگەن زاڭ شىعۋى مۇمكىن»، - دەيدى دجەك ما.
ونىڭ پايىمىنشا، بولاشاقتا عالامشاردا روبوتتار كوبەيۋى ىقتيمال، ولار ادامعا قىزمەت ەتىپ، كەي سالالاردا ادامداردى الماستىرۋى مۇمكىن.
«روبوتتار ۇيقى، جالقاۋلىق دەگەندى بىلمەيدى. ولارعا قىزمەتتەرى ءۇشىن تەك ەلەكتر ەنەرگياسى عانا كەرەك. سونداي-اق روبوتتاردا ۇمىتشاقتىق دەگەن جوق. سوندىقتان دا ادام ءوزىن تەحنيكامەن سالىستىرا المايدى»، - دەيدى ساراپشى.
ونىڭ ايتۋىنشا، بۇگىندە الەم ەلەۋلى وزگەرىسكە ۇشىرادى، تەحنولوگيالار كەز كەلگەن ەلدىڭ دامۋى ۇدەرىسىنە ىقپال ەتەدى.
ەستەرىڭىزگە سالا كەتەيىك، قىتايلىق بيزنەسمەننىڭ داۋلەتى بۇگىندە ءتۇرلى ەسەپتەۋلەر بويىنشا 30 ميلليارد دوللاردان استى. دجەك ما قۇرعان Alibaba ساۋدا تۇعىرناماسى اينالىمى بويىنشا Amazon جانە eBay دان وزىپ كەلەدى.
اۆتور: رۋسلان عابباسوۆ
