مەتەوريتتەن ءبىر ادام قازا تاپتى: 200 جىلدان كەيىنگى وقيعا

استانا. ءۇندىستاندا جەرگە قۇلاعان مەتەوريت ءتيىپ ءبىر ادام قازا تاپتى، بۇنداي قايعىلى وقيعا سوڭعى رەت وسىدان 200 جىلداي بۇرىن تىركەلىپتى.

بۇل تۋرالى Reuters اگەنتتىگى حابارلادى.

«مەتەوريت كوللەدج عيماراتىنا قۇلاعان»، - دەيدى تاميلناد شتاتىنىڭ باسشىسى جايالاليت جايارام. ونىڭ ايتۋىنا قاراعاندا اسپان دەنەسى تيگەن ەر ادام قاتتى جاراقات الىپ، اۋرۋحاناعا جەتپەي قايتىس بولعان. مارقۇم بولعان ادام اۆتوبۋس جۇرگىزۋشىسى بولىپ قىزمەت ەتكەن. ونىڭ وتباسىنا وقۋ ورنى 1.47 مىڭ دوللار وتەماقى تولەگەن.

كەيىن بەلگىلى بولعانداي، اسپان دەنەسى قۇلاعان شاقتا ەر ادام كوللەدج اسحاناسىنىڭ جانىندا تۇرعان. وعان جاقىن جۇرگەن ەكى ستۋدەنت جانە باعبان دا جاراقات الىپتى. سونىمەن قاتار، وقۋ ورنىنىڭ عيماراتىنا دا زاقىم كەلگەن. مەتەوريت قالدىعى وقيعا ورنىنان تابىلدى.

International Comet Quarterly باسىلىمىنىڭ جازۋىنا قاراعاندا، سوڭعى رەت اسپان دەنەسى قۇلاۋ كەزىندە قازا تاپقان ادام تۋرالى دەرەك 1825-جىلى تىركەلىپتى.