دەنيس تەننىڭ قازاقستانداعى شوۋىنا جاپونيادان كەمىندە 200 جانكۇيەر كەلۋى مۇمكىن
بۇل تۋرالى بۇگىن استانادا وتكەن باسپا ءسوز ءماسليحاتىندا سپورتشىنىڭ ءوزى ءمالىم ەتتى.
«مەن جاپونياداعى «Christmas on Ice» (مۇز ۇستىندەگى روجدەستۆو) اتتى مۇز شوۋىنان ورالىپ وتىرمىن. ولار مەنى ەكى جىل قاتارىنان شاقىردى. مەن ءۇشىن جاپونيادا ءوز ونەرىمدى تاعى ءبىر پاش ەتىپ، جاڭا جىلدىق ىقىلاسقا بولەنۋ ۇلكەن قۇرمەت بولدى»، - دەيدى د. تەن.
ونىڭ ايتۋىنا قاراعاندا، بۇنداي جوبالار سپورتشىنىڭ تاجىريبەسىن ارتتىرۋعا عانا ەمەس، قازاقستاندىق جوبانى العا جىلجىتۋ ءۇشىن اسا قاجەت.
«وسىنداي كەزدە مەن قازاقستاندىق شوۋدىڭ سالماعى مەنىڭ موينىمدا ەكەنىن تۇسىنەمىن، سوندىقتان مانەرلەپ سىرعاناۋ سپورتىن ۇلكەن شوۋ ەتە بىلگەن جاپونيا سىندى ەلمەن ءبىر دەڭگەيدە وتكىزۋدى ويلايمىن. سوناۋ جاپونيادا قازاقستانداعى شوۋعا ۇلكەن قىزىعۋشىلىق بار. مەن تۋريستىك اگەنتتىكپەن سويلەستىم. ولاردىڭ ايتۋىنشا، ەگەر ءبىز قازاقستاندىق شوۋ وتەتىن مەرزىمدى ەكى اي بۇرىن حابارلاندىرساق، اگەنتتىك بىردەن 200 VIP- بيلەتتى ساتىپ الاتىندىقتارىن ايتتى. سەبەبى ولار جاپونيادان كەمىندە 200 تۋريست كەلەتىندىگىنە سەنىمدى»، - دەپ اتاپ ءوتتى سپورتشى.
ايتا كەتەيىك، دەنيس تەن قازاقستاندا ءۇش جىل قاتارىنان الەمنىڭ تانىمال سپورتشىلارىنىڭ قاتىسۋىمەن مۇز شوۋىن وتكىزىپ كەلەدى.
اۆتور: جاسۇلان جولدىبايەۆ
