شونجىدا «قازاق ەلى» فيلمىنىڭ تۇسىرىلىمىنە 200 ادام قاتىسىپ جاتىر – فوتو، كەسكىن

استانا. قازاقپارات - «قازاق ەلى» تاريحي كوپ سەريالىق تەليەۆيزيالىق جوبانىڭ ءىرى ماسشتابتاعى تۇسىرىلىمدەرى الماتى وبلىسىنىڭ شوشاناي اۋىلىندا ءوتىپ جاتىر، - دەپ حابارلايدى Tengrinews.kz ءتىلشىسى ءتۇسىرىلىم ورنىنان.

 شىق دالادا كەرەي مەن جانىبەكتىڭ كوشتەگى ءساتى ءتۇسىرىلدى. كوش كەزىنىڭ تۇسىرىلىمىنە  200 دەن اسا ادام، 150 جىلقى جانە 10 تۇيە قاتىستىرىلعان. رەجيسسەر رۇستەم ابدراشيەۆتىڭ كارتيناسىنىڭ ءتۇسىرىلىم جۇمىستارى رەسمي تۇردە 7- قىركۇيەكتە شاكەن ايمانوۆ اتىنداعى «قازاق فيلم» كينوستۋدياسىنىڭ تەرريتورياسىندا باستالعان بولاتىن. كوماندا «قازاق فيلم» تەرريتورياسىنداعى كيىز ۇيلەر مەن سارايلارداعى تۇسىرىلىمدەردى اياقتادى. ال 15- قاراشادا ءتۇسىرىلىم توبى قاپشاعايعا اتتانادى.

«قازاق ەلى» كوپ سەريالىق فيلمىنىڭ -1465 جىلى قازاق مەملەكەتىنىڭ قۇرىلۋ كەزەڭىن، جانىبەك پەن كەرەيدىڭ، ولاردىڭ بالالارى قاسىم مەن بۇرىندىقتىڭ بيلىك ەتكەن كەزەڭىن قامتيتىنى بەلگىلى. فيلم ءىلياس ەسەنبەرليننىڭ «كوشپەندىلەر» رومانىنىڭ ءبىرىنشى تومى بويىنشا ءتۇسىرىلۋ ۇستىندە. رەجيسسەر رۇستەم ابدراشيەۆتىڭ ايتۋىنشا، قازىرگى ۋاقىتتا ماتەريالدىڭ 40 پايىزى ءتۇسىرىلدى، مونتاجى قاتار جاسالىپ جاتىر.

«550 جىل بۇرىن بولعان وقيعا - قازاق حاندىعىنىڭ ءبولىنۋى جانە جاس مەملەكەتتىڭ دامۋى، - وتە قاۋىر كەزەڭدە بولدى. بۇل التىن وردا دەگەن ۇلكەن يمپەريانىڭ قۇلاعان ساتىندە بولدى، سونىڭ سالدارىنان الەم كارتاسىندا جاڭا مەملەكەتتەر پايدا بولدى، سول زامانداعى كوشباسشىلاردىڭ ءبىرى قازاق حاندىعى»، - دەدى ابدراشيەۆ.

«قازاق ەلى» فيلمىنىڭ تۇسىرىلىمىنە مەملەكەتتىك بيۋدجەتتەن شامامەن ءبىر ميلليارد تەڭگەنىڭ بولىنگەنى بەلگىلى. سونىمەن قاتار، جوبانى مەتسەناتتار قولداپ وتىر، ولار 100 ميلليون تەڭگە شاماسىندا قاراجات جيناعان.

«تارييحي كارتينانى جاساۋ وڭاي ەمەس، قازىر الەمدىك داعدارىستىڭ كەزى. مۇنىڭ ءبارى اسەر ەتتى. كەشىكتىك، قيىندىقتار بولدى. بارلىعىمىز جۇمىلىپ، ماقساتتى ورىنداعىمىز كەلەدى. ۇلكەن ءتۇسىرىلىم توبىمىز بۇل ءىستى ماحابباتپەن، پاتريوتتىق سەزىممەن ىستەپ جاتىر. ءبىز قىرۋار قارجى تاپپايمىز. الايدا ءار كادردىڭ كاسىبي بولىپ شىعۋى ءۇشىن قولىمىزدان كەلگەندى جاساپ جاتىرمىز. وسى ءىرى جوبانىڭ بولشەگى بولعانىما قۋانىشتىمىن»، - دەدى ابدراشيەۆ.

كارتينادا باستى رولدەردە ەركەبۇلان دايىروۆ (جانىبەك) قايرات كەمالوۆ (كەرەي)، ايان وتەپبەرگەن (بۇرىندىق)، مەيىرعات امانگەلدين (قاسىم)، بەكبولات تىلەۋحان ( قازتۋعان)، دوسحان جولجاقسىنوۆ، ديماش احيموۆ، شۇعىلا ساپارعالي قىزى (كەرەيدىڭ ايەلى)، مادينا ىسمانوۆا (جانىبەكتىڭ ايەلى) وينايدى. سەريالعا قازاقستاندىق ارتىستەر عانا تۇسپەيدى، سونىمەن قاتار، حاكاسيا، مونعوليا، وزبەكستاننىڭ اكتەرلەرى دە تارتىلادى. ال تريۋكتەردى انىمال كاسكادەر جايداربەك كۇنعوجينوۆتىڭ كومانداسى جاسايدى.