استانادا وتەتىن «ءبىرجان- سارا» سپەكتاكلىنە شامامەن 200 ونەرپاز قاتىسادى

استانا. قازاقپارات - مۇقان تولەبايەۆتىڭ «ءبىرجان- سارا» وپەراسىنا جاقىندا 70 جىل تولادى. ونداعان جىلدار وتسە دە، ول بۇگىن دە ۇلگىلى شىعارما، قازاق وپەراسى ونەرىنىڭ مارجانى، جاۋھارى بولىپ تابىلادى.

2015 -جىلدىڭ 30 -قازانىندا «استانا وپەرا» تەاترى اتالعان سپەكتاكلدى قويۋشى ديريجەر ابزال مۇحيتدينوۆتىڭ مۋزىكالىق رەداكسياسىندا ۇسىنادى.

باستى رولدەردە وينايتىندار مەن ورىنداۋشىلار: ءبىرجان - بەيىمبەت تاڭارىقوۆ، سارا - قازاقستاننىڭ ەڭبەك سىڭىرگەن قايراتكەرى ءجاميليا جارقىمبايەۆا. جانبوتا - قازاقستاننىڭ ەڭبەك سىڭىرگەن قايراتكەرى جانات شىبىقپايەۆ. التىناي - قازاقستاننىڭ ەڭبەك سىڭىرگەن قايراتكەرى بيبىگۇل جانۇزاق. انالىق - گۇلجانات ساپاقوۆا، قوجاعۇل - ەسكەندىر ءابجانوۆ، جيەنقۇل - تالعات عالەيەۆ، ەستاي - نارۇل تويكەنوۆ، سەرىك - قازاقستاننىڭ ەڭبەك سىڭىرگەن قايراتكەرى جان تاپين. قويۋشى رەجيسسەرى - رەسەيدىڭ حالىق ءارتىسى يۋري الەكساندروۆ.

وپەرانىڭ باستى كەيىپكەرلەرى - ومىردە شىنايى ءومىر ءسۇرىپ، شەشەندىك ايتىستارىمەن اتاقتارى شىققان قازاقتىڭ كومپوزيتورى، اقىن ءبىرجان سال قوجاعۇل ۇلى پەن اقىن سارا تاستانبەك قىزى. ءانشى ءبىرجاننىڭ داۋسى كەرەمەت زور ەدى، سونىسىمەن قاتار اسقان شەبەر دومبىراشى بولعان. ول جالپى حالىقتىڭ سۇيىكتىسىنە اينالعان بىرەگەي مۋزىكالىق- پوەزيالىق شىعارمالار جازىپ، بارشا تالانتتى جاستاردى ءوزىنىڭ اينالاسىنا جينادى.

ليريكالىق- درامالىق شىعارمانىڭ (ق. جۇماليەۆتىڭ ليبرەتتوسى) نەگىزىندە، حالىق ءانشىسى ءبىرجان مەن دارىندى اقىن سارانىڭ اراسىندا تۋىنداعان سۇيىسپەنشىلىك پەن رۋحتىڭ كۇشى جايلى وقيعا جاتىر. «حالىق شىعارماشىلىعى - كەز كەلگەن ادام بالاسى ءۇشىن سارقىلماس شابىت كوزى. ودان ءبىز كۇش- قۋات الامىز، ونسىز زامانداستارىمىزدىڭ ويى مەن ارمانىن جەتكىزۋ مۇمكىن ەمەس»، - دەگەن ەكەن مۇقان تولەبايەۆ.

وپەرادا وتكەن ءومىر باياندالادى، الەۋمەتتىك تەڭسىزدىك پەن بايلار زومبىلىعى كورسەتىلەدى. سيۋجەتتە ونەر ادامىنىڭ تاۋەلسىزدىگى، ماحاببات پەن باقىتقا قول جەتكىزۋ قۇقىعى ءۇشىن كۇرەس سارىنى ءبىرىنشى كەزەكتە تۇر. وپەرانىڭ سوڭى قايعىلى اياقتالادى -  ءبىرجان مەرت بولادى. الايدا ونىڭ حالقىنا دەگەن ىستىق سۇيىسپەنشىلىگىنە جانە جارقىن بولاشاق جايلى ارماندارىنا تولى شابىتتاندىراتىن اندەرى ماڭگى جاسايدى.

م. تولەبايەۆتىڭ وپەرالىق جاۋھارى ونەردىڭ اسقاق جاراتىلىس ەكەنى تۋرالى يدەيانى، سۋرەتشىنىڭ وشپەس عۇمىرىن، ونىڭ جاۋىزدىقپەن ءھام ادىلەتسىزدىكپەن ماڭگى كۇرەسىن دالەلدەيدى.

Baq.kz