شىمكەنت اكىمىنە ۇيالى تەلەفونداعى قوسىمشا ارقىلى 200 ارىز-شاعىم كەلىپ ءتۇستى
ۇيالى تەلەفونداعى اتالعان باعدارلاما ارقىلى تۇرعىندار قالا اكىمىنە ارىز-شاعىمدارىن تىكەلەي جەتكىزۋدە. سوڭعى ون كۇن ىشىندە شاھار باسشىسىنا بارلىعى 200 دەي حات كەلىپ تۇسكەن.
WhatsApp ارقىلى ع. ءابدىراحىموۆقا شاعىم ايتقان 8- شاعىناۋداننىڭ تۇرعىندارى بولدى. ايتۋلارىنشا، جەلتوقسان مەن مومىش ۇلى كوشەلەرىنىڭ قيىلىسىندا ورنالاسقان سۇلۋلىق سالونى سانيتارلىق تالاپتاردى ورىنداماي كەلگەن. اتالعان ورتالىق قىزمەتكەرلەرى كوشە بويىنا كىر جايۋدى ادەتكە اينالدىرعان كورىنەدى. ىسكە دەرەۋ ءتارتىپ ساقشىلارى ارالاسىپ، سالون يەلەرىنە 20 ا ە ك كولەمىندە ايىپپۇل سالىندى.
تۇرعىندار WhatsApp ارقىلى ارىز ايتۋدىڭ ىڭعايلى ەكەنىن جاسىرمايدى. ويتكەنى، سوزىڭە دالەل بولۋ ءۇشىن سول مەزەتتە پروبلەمانى سۋرەتكە نەمەسە ۆيدەوعا ءتۇسىرىپ جىبەرۋگە بولادى. سوڭعى 10 كۇن ىشىندە كەلىپ تۇسكەن 200 حابارلامانىڭ 140 نا ماماندار ارالاسىپ، پروبلەمانى سول ساتتە شەشىپ بەرىپتى.
اكىمگە ارىز ايتاتىنداردىڭ كوپشىلىگىن قالانىڭ سانيتارلىق جاعدايى الاڭداتادى. كەلىپ تۇسكەن حابارلامالاردىڭ ىشىندە 58 ادام كۇل-قوقىستىڭ رەتسىز شاشىلىپ جاتقانىن ايتسا، 30 تۇرعىن كوممۋنالدى پروبلەمالاردى جازعان.
Baq.kz
