مادەنيەت جانە سپورت مينيسترلىگى جۇمىسىنان 200 دەن استام زاڭنامانى بۇزۋشىلىق انىقتادى

مادەنيەت جانە سپورت مينيسترلىگى مەن ونىڭ كوميتەتتەرى مەملەكەتتىك قىزمەتتىڭ 15 ءتۇرىن كورسەتەدى. قولدانىستاعى مەملەكەتتىك قىزمەت تۋرالى زاڭنامانى بۇزۋشىلىقتار انىقتالدى، دەپ حابارلادى سىبايلاس جەمقورلىققا قارسى ۆەدومستۆو باسپا ءسوز قىزمەتى.
مىسالى، مينيسترلىك پەن ونىڭ كوميتەتتەرى قىزمەت كورسەتۋ مەرزىمدەرىن بۇزۋعا جول بەرگەن. ىرىكتەۋ تەكسەرۋ بارىسىنىڭ وزىندە 190 نان استام وسىنداي فاكتىلەر انىقتالدى. سونىمەن قاتار، قىزمەت الۋشىلار پاكەتتەرىندە مەمقىزمەت ستاندارتىندا كوزدەلمەگەن قۇجاتتار انىقتالعان. ياعني، مەملەكەتتىك قىزمەت كورسەتكەن كەزدە ارتىق قۇجاتتار تالاپ ەتكەن.
سونداي- اق، اگەنتتىك بوس مەملەكەتتىك لاۋازىمعا بايقاۋ وتكىزۋ تالاپتارىن، مەمقىزمەتشىلەردى دايىنداۋ، قايتا دايارلاۋ، بىلىكتىلىگىن ارتتىرۋ قاعيدالارىن، انت قابىلداۋ قاعيدالارىن جانە ت. ب. بۇزۋ فاكتىلەرى انىقتالدى.
مىسالى، مادەنيەت جانە سپورت مينيسترلىگىندە 2015 -جىلعى قاڭتاردا كونكۋرس بارىسىندا 77 كانديداتپەن سۇحبات جۇرگىزىلگەن. بۇل رەتتە اڭگىمەلەسۋ حاتتاماسىن رەسىمدەمەگەن. سونىمەن قاتار، 37 كانديداتپەن اۋديوجازبا جوق. سونداي- اق سۇراقتار تەڭ قويىلماعان، بەكىتىلمەگەن تىزبەدەن سۇراقتار قويىلعان.
تەكسەرۋ بارىسىندا سىبايلاس جەمقورلىق تاۋەكەلدەرىنە تالداۋ جۇرگىزىلدى. تالداۋ بارىسىندا 10 نان استام «جاسىرىن» مەملەكەتتىك قىزمەت (مينيسترلىكتىڭ ستاندارتتاۋعا جاتاتىن، ونىڭ ىشىندە رۇقسات بەرۋ فۋنكتسيالارى) انىقتالدى.
تالداۋ بارىسىندا سىبايلاس جەمقورلىققا قارسى زاڭنامانىڭ پايدالانۋى تابىس الۋعا اكەلەتىن مۇلىكتى سەنىمگەرلىك باسقارۋعا بەرۋ بولىگىن بۇزۋشىلىقتار انىقتالدى.
بۇزۋشىلىقتارعا جول بەرگەنى ءۇشىن مينيسترلىك پەن ونىڭ ۆەدومستۆولارىنىڭ 12 لاۋازىمدى تۇلعاسى مەن قىزمەتكەرلەرى تارتىپتىك جاۋاپكەرشىلىككە تارتىلدى.
اگەنتتىك انىقتالعان بۇزۋشىلىقتاردى، ولاردى جاساۋعا جول بەرەتىن سەبەپتەر مەن جاعدايلاردى جويۋ ماقساتىندا ءتيىستى ۇسىنىمداردى پىسىقتادى. وسىنىڭ نەگىزىندە مادەنيەت جانە سپورت مينيسترلىگىندە انىقتالعان بۇزۋشىلىقتاردى جويۋ بويىنشا جاۋاپتى لاۋازىمدى ادامدار مەن ناقتى مەرزىمدەرىن كورسەتە وتىرىپ، شارالار جوسپارىن بەكىتتى.
جارتى جىلدىق نەگىزدە مينيسترلىك شارالار جوسپارى مەن اگەنتتىك ۇسىنىمدارىن ورىنداعانى تۋرالى ەسەپ بەرەتىن بولادى.