كاسىپكەر ءاربىر قىزمەتكەرىنە 200 مىڭ دوللاردان سىياقى تاراتتى

كاسىپكەردىڭ وسىنشا مىرزالىق تانىتىپ، قىزمەتكەرلەرگە قوماقتى سىياقى تولەۋىنىڭ قۇپياسى نەدە؟

تۇركياداعى Yemeksepeti تاماققا تاپسىرىس بەرۋ قىزمەتىنىڭ باسشىسى نيەۆزات ايدىن دوڭگەلەتىپ وتىرعان بيزنەسىن ساتىپ جىبەردى. كاسىپكەر قارماعىندا جۇمىس ىستەگەن 114 ادامنىڭ اربىرىنە اناۋ-مىناۋ ەمەس 200 مىڭ دوللاردان سىياقى تولەپتى، دەپ حابارلايدى epochtimes.ru.

27 ميلليون دوللاردى جۇرتقا تاراتقان ايدىننىڭ ءوزى نەمىستىڭ Delivery Hero كومپانياسىنا بيزنەسىن ساتۋدان $589 ميلليون پايدا كورگەن ەكەن. ال ول ءوزىن «مىرزالىق تانىتتىم» دەپ سانامايتىن كورىنەدى. تابىستى ستارتاپتىڭ باس ديرەكتورى مۇنداي كىرىسكە ۇجىمنىڭ جۇكتى جۇمىلا كوتەرۋىنىڭ ارقاسىندا جەتكەنىن ايتادى.

وسى رەتتە ايدىن مىرزانىڭ ءوزى بىلاي دەپتى: «سىياقىنى العان كەزدە ادامدار قۋانعاننان كوز جاستارىنا ەرىك بەرىپ، ايقايلاپ، بارلىق ەموتسيالارىن سىرتقا شىعارىپ جاتتى. كەيبىرەۋلەرى ماعان العىس حات جازدى. مەن ولاردى تولىعىمەن تۇسىنەمىن. سەبەبى ەندى ولار ارمانداعان نارسەلەرىنىڭ ءبارىن ساتىپ الا الادى. ال بۇرىنعى 5 مىڭ ليرالىق جالاقى بولسا، ەشتەڭەگە جەتپەي تيتىقتايتىن ەدى. مەن ادامدارعا بەرگەن ۇستىنە بەرە تۇسكىم كەلەدى».

ءبىر قىزىعى، Yemeksepeti قىزمەتى ساتىلعان جاعدايدا ونىڭ قىزمەتكەرلەر الدىندا ەشبىر مىندەتتەمەسى بولماعان ەكەن. جالپى كاسىپكەردىڭ ۇجىمعا مۇنشا سىياقى تولەۋى تۇركيا تاريحىندا ەڭ العاش رەت بولعان ءجايت. Yemeksepeti - تۇرىك جەرىندەگى تاماق جەتكىزۋدىڭ ەڭ ءىرى سەرۆيسى. تاپسىرىس 30-45 مينۋتتا جەتكىزىلەدى، دەپ جازادى 24.kz.