اسكەري ءبولىمنىڭ 200 جاس ساربازى وتان الدىندا انت بەردى

اقتوبە. قازاقپارات - استانا كۇنى قارساڭىندا ق ر تۇڭعىش پرەزيدەنتى اتىنداعى ساياباقتا 6655 اسكەري ءبولىمىنىڭ جاس ساربازدارى سالتاناتتى تۇردە انت قابىلدادى.

شاراعا ءبولىم ارداگەرلەرى، مەملەكەتتىك مەكەمە مەن قوعامدىق ۇيىمداردىڭ وكىلدەرى شاقىرتىلدى.

سونىمەن قاتار اقتوبەگە الماتى، استانا، قوستانايدان ساربازداردىڭ تۋىستارى كەلدى.

ادەتتەگىدەي بولىمشەنىڭ الدىنا ونىڭ تۋى شىعارىلدى. ءبولىم كومانديرى پولكوۆنيك تالعات ابىكەشوۆ جينالعانداردىڭ الدىندا ءسوز سويلەدى.

وتان الدىندا انت قابىلداعان جاس جاۋىنگەرلەردى «نۇر وتان» پارتياسىنىڭ اقتوبە وبلىستىق فيليالى ءتوراعاسىنىڭ ورىنباسارى نۇرحان اقنيازوۆ قۇتتىقتادى.

200 جاس سارباز اسكەري ءبولىمنىڭ تۋى الدىندا «ءومىرىنىڭ سوڭىنا دەيىن قازاقستان حالقى مەن زاڭدى سايلانعان پرەزيدەنتكە ادال بولۋعا، ەگەمەندى ەلدىڭ كونستيتۋتسياسى مەن زاڭىن بۇلجىتپاي ساقتاۋعا» انت بەردى.

شارا سوڭى كونتسەرتكە ۇلاستى. قوناقتار مەن ساربازداردىڭ اتا- انالارىنا بولىمدە ەكسكۋرسيا ۇيىمداستىرىلدى.