تولەگەن مۇحامەدجانوۆ: «قۇنانباي» فيلمىنە مۋزىكا جازۋ ءۇشىن كينونى 200 رەت كورىپ شىقتىم دەسەم بولادى
بۇل تۋرالى تولەگەن مۇحامەدجانوۆ تۋىندىنىڭ ب ا ق وكىلدەرىنە ارنالعان الدىن- الا كورسەتىلىمنەن كەيىن وتكەن بريفينگ بارىسىندا ءمالىم ەتتى، دەپ حابارلايدى BNews.kz ءتىلشىسى.
«دوسحانمەن بىرگە ەكىنشى فيلمگە كومپوزيتور رەتىندە قاتىسىپ وتىرمىن. ءبىرىنشى فيلم - «ءبىرجان سال» بولدى. «ءبىرجان سالعا» مۋزىكا جازعاندا دوسحان ەكەۋمىزدىڭ ماقساتىمىز - ءبىرجاننىڭ اندەرىن باسقا لەبىزبەن حالىققا ۇسىنۋ بولدى. ال، «قۇنانباي» فيلمىنە مۋزىكا جازۋ ماعان وڭاي بولعان جوق. سەبەبى، وتە تەرەڭ ويمەن تۇسىرىلگەن كينو. فيلمگە مۋزىكا جازۋ ءۇشىن وسى كينونى 100 رەت، 200 رەت كورىپ شىقتىم دەسەم بولادى.
كينونىڭ ءاربىر ەپيزودىنا لايىقتى اسەر قالدىراتىن مۋزىكا جازۋ كەرەك بولدى. سونداي- اق قۇنانبايعا ابايسىز مۋزىكا جازۋ مۇمكىن ەمەس. اباي تەك قانا ۇلى اقىن، ۇلى فيلوسوف بولعان جوق، ۇلى كومپوزيتور بولدى. سوندىقتان، ابايدىڭ «قاراڭعى تۇندە تاۋ قالعىپ» ءانىنىڭ اۋەنىن الدىق. جالپى، مەنىڭ ويىمشا، سول كەزدە ءبىزدىڭ قازاق حالقىنىڭ باسىنان ءوتىپ جاتقان جاعداي، ەڭ باستىسى، قۇنانبايدىڭ باسىنان وتكەن وقيعالار ابايدىڭ تراگەديالىق ءۇنى بار «قاراڭعى تۇندە تاۋ قالعىپ» انىنە كەلەدى. سوندىقتان، وسى اۋەندى الىپ، كينوعا قولداندىم» ، - دەيدى بەلگىلى كومپوزيتور تولەگەن مۇحامەدجانوۆ.
ەستەرىڭىزگە سالا كەتەيىك، «قازاق فيلم» كينوستۋدياسى تۇسىرگەن رەجيسسەر دوسحان جولجاقسىنوۆتىڭ «قۇنانباي» فيلمى 25 - مامىردان باستاپ پروكاتقا شىعادى.
كەنجەكەي توقتامۇرات
