پاريجدە قورقىت اتا كىتابىنىڭ 200 جىلدىعى اتاپ ءوتىلدى - فوتو

پاريج. قازاقپارات - فرانسيا استاناسىندا يۋنەسكو كونسەرت زالىندا يۋنەسكو-نىڭ 70 جىلدىق مەرەيتويىنىڭ اياسىندا «قورقىت اتا» كىتابىنىڭ العاش جارىققا شىعۋىنىڭ 200 جىل تولۋىنا وراي حالىقارالىق تۇركى اكادەمياسىمەن بىرلەسىپ قازاقستان، ازەربايجان، تۇركىمەنستان جانە تۇركيانىڭ تۇراقتى وكىلدىكتەرىمەن سالتاناتتى كونسەرت ۇيىمداستىرىلدى.

شاراعا جوعارى ۇيىم حاتشىلىعىنىڭ وكىلدەرى، تۇركى تىلدەس مەملەكەتتەردەن مارتەبەلى مەيماندار مەن ديپلوماتيالىق ميسسيانىڭ جانە فرانسياداعى قازاق دياسپوراسىنىڭ وكىلدەرى قاتىستى.

مۇندا ءسوز سويلەگەن ق ر مەملەكەتتىك حاتشىسى گۇلشارا ءابدىقالىقوۆا قورقىت اتا بەينەسى ەۋرازيا كەڭىستىگىندەگى تۇركى جۇرتىنىڭ مادەني جانە رۋحاني داستۇرلەرىنىڭ التىن كوپىرى سانالاتىنىن، ءارى قورقىت اتا كىتابى بۇكىل تۇركى تىلدەس حالىقتاردىڭ ماقتانىشى بولىپ تابىلاتىنىن اتاپ ءوتتى.

شاراعا مىڭنان استام قوناق جينالدى. مادەني كەشتىڭ كونسەرتتىك باعدارلاماسىندا ازەربايجان، تۇركيا، تۇركىمەنستان جانە وزبەكستاننان كەلگەن ونەرپازدارمەن قاتار قازاق ۇلتتىق ونەر ۋنيۆەرسيتەتىنىڭ سيمفونيالىق وركەسترىنىڭ ورىنداۋىندا ۇلتتىق ساز اسپاپتارىمەن قورقىت ءداستۇرىن كەڭىنەن تانىتاتىن اۋەندەر جۇرتشىلىققا جاڭا قىرىنان ۇسىنىلدى. سونداي-اق قازاقتىڭ سكريپكاشى قىزى، قازاقستاننىڭ حالىق ءارتىسى ايمان مۇساقوجايەۆا دا ولاردىڭ الدىندا ءوز ونەرىن پاش ەتتى.

كەش سوڭىندا كەلۋشىلەرگە قازاقتىڭ ۇلتتىق تاعامدارى ۇسىنىلىپ، تۇركى تىلدەس حالىقتاردىڭ مادەنيەتى مەن داستۇرلەرىمەن تانىسۋ مۇمكىندىگى بەرىلدى.