تاۋەلسىزدىك تولعاۋى: تاۋەلسىزدىك كۇنىنە وراي 200 گە جۋىق كۇيشى قاتىسقان ونەر كەشىنىڭ اسەرى ەرەكشە بولدى
استانا قالاسىندا ەكىنشى رەت ۇيىمداستىرىلىپ وتىرعان بۇل كونتسەرتتىك باعدارلامانىڭ ءجونى بولەك. «مىڭ كۇي» اتتى كۇي كەشى تاۋەلسىزدىك كۇنىنە وراي جانە قازاق حاندىعىنىڭ 550 - جىلدىعىنا ارنالىپ ۇيىمداستىرىلىپ وتىر. التى وركەستردىڭ، 200 گە جۋىق كۇيشىلەردىڭ قاتىسۋىمەن بولعان كونتسەرتتىڭ كورەرمەن قاۋىمعا اسەرى دە ەرەكشە بولدى. اتالعان كەشتە ورىنداۋشىلىق شەبەرلىگىمەن جۇرتتىڭ ىقىلاسىنا بولەنگەن بەلگىلى كۇيشى- كومپوزيتور سەكەن تۇرىسبەك بۇل جولعى اسا ەرەكشە كۇي كەشى تۋرالى وي بولىسكەن ەدى.
«بۇل استانا قالاسى مادەنيەت باسقارماسىنىڭ باستىعى بولات ماجاعۇلوۆتىڭ جاستا بولسا باس بولىپ ۇيىمداستىرۋىمەن، ەكىنشى رەت ءوتىپ وتىرعان شارا. قازاقتا 7000 عا جۋىق كۇي بار دەيمىز. ءبىراق، تىڭقىلداپ جاتقان دۇنيەنىڭ ءبارى كۇي ەمەس. كۇي اتاۋلىنى، ءبىر فورماسىن تاۋىپ، ارناسىنا ءتۇسىرۋ كەرەك. قازاقستاندا قانشاما وركەسترلەر بار. ولاردىڭ بارلىعىندا ءبىر- ءبىرىن قايتالامايتىنداي، جاڭا كۇيلەر بولسا. ولار جىلدا وتەتىن وسىنداي ءىس- شارالارعا ءارقايسىسى جاڭا 5 كۇي اكەلىپ وتىرسا. ونداي جاعدايدا جىلىنا جاڭا 60-70 كۇي كەلەدى دەگەن ءسوز. سولاردىڭ ىشىنەن تاڭداۋلى وركەسترلەردىڭ قاتىسۋىمەن مىناداي ۇلكەن سارايدا جىل سايىن، ءوتىپ وتىرسا وندا نۇر ۇستىنە نۇر بولار ەدى دەپ ويلايمىن. وسى جولعى شارا كوڭىلدەگىدەي ءوتىپ جاتىر. دەگەنمەن ازداپ قايتالاۋلار دا بار. اسىرەسە، بۇگىنگىدەي داڭعازا مۋزىكا جاۋلاپ بارا جاتقان زاماندا بۇرىنعىداي كونە سارىنداردى ازايتىپ، تىڭ دۇنيەلەر جاساساق دەيمىن. مۇحتار اۋەزوۆ ايتقان «قازاق ونەرىندەگى ەڭ كۇردەلىسى، ەڭ تولعاۋلىسى، ەڭ سىرلىسى - كۇي ونەرى» دەپ. سوندىقتان ءبىز وسىنداي تولعاۋلى، سىرلى، شوقتىعى بيىك اسىل مۇرامىزدى دامىتۋىمىز كەرەك. كەشە عانا وسى كۇي مەن دومبىرامىز يۋنەسكو- دا اسىل مۇرالار تىزىمىنە ەندى عوي.
بۇگىنگى «مىڭ كۇي» اتتى بۇل كەش حالىق كوڭىلىنەن شىعاتىنداي دارەجەدە ءوتتى دەپ ويلايمىن. ونەرىمىز وسىلاي وسە بەرسىن. قازاقستاننىڭ تاۋەلسىزدىك كۇنى قۇتتى بولسىن. ەلىمىز بۇگىنگىدەي تىنىش، بەيبىت قالىپتا وركەندەپ وسە بەرسىن، تاۋەلسىزدىگىمىز ماڭگىلىك بولسىن» ، - دەدى ق ر ەڭبەك سىڭىرگەن ءارتىسى، كۇيشى- كومپوزيتور.
بەيسەن سۇلتان
