قازاقستاندا 2006-جىلعى 5-10 مىڭ تەڭگەلىك بانكنوتتار اينالىمنان شىعارىلادى
بۇل تۋرالى ق ر ۇلتتىق بانكىنىڭ باسپا ءسوز قىزمەتى حابارلادى.
باسپا ءسوز قىزمەتىنىڭ حابارلاۋىنشا، 3- قازانعا دەيىن بۇل بانكنوتتار زاڭدى تولەم قۇرالى رەتىندە قازاقستان اۋماعىندا تولەمدەر جانە بانك وپەراتسيالارى ءۇشىن قانداي دا بولماسىن شەكتەۋسىز پايدالانىلادى.
بۇل بانكنوتتاردى ۇلتتىق بانكتىڭ بارلىق فيليالدارىندا ولاردىڭ اينالىستان شىعۋىن كۇتپەي ايىرباستاۋعا بولادى.
ودان كەيىن 12 اي ىشىندە، ياعني 2016-جىلعى 4- قازان 2017-جىلعى 3- قازان ارالىعىندا قوسا العاندا كورسەتىلگەن كۋپيۋرالار كەز كەلگەن ەكىنشى دەڭگەيدەگى بانكتە ايىرباستالۋى ءتيىس.
ق ر اكىمشىلىك قۇقىق بۇزۋشىلىق تۋرالى كودەكسىنە سايكەس بانكنوتتاردى قابىلداۋدان باس تارتقان شاعىن كاسىپكەرلىك سۋبەكتىلەرى نەمەسە كوممەرتسيالىق ەمەس ۇيىمدار 5، ورتا كاسىپكەرلىك سۋبەكتىلەرى 10، ءىرى كاسىپكەرلىك سۋبەكتىلەرى 25 ا ە ك مولشەرىندە ايىپپۇل تولەيتىن بولادى.
بانكتەر جانە بانك وپەراتسيالارىنىڭ جەكەلەگەن تۇرلەرىن جۇزەگە اسىراتىن ۇيىمدار بانكنوتتاردى قابىلداۋدان، ۇساقتاۋدان جانە ايىرباستاۋدان باس تارتسا، 50 ايلىق ەسەپتىك كورسەتكىش مولشەرىندە ايىپپۇل سالىنادى.
اۆتور: گۇلميرا عوسمانالي
