ۋكراين حالقى بۇگىندە 2000 -جىلعى دەڭگەيمەن ءومىر سۇرەدى

استانا. قازاقپارات - قالتا تەلەفونىمەن قوش ايتىسىپ، جىلىنا ەكى كەلى دوڭىز سۇبەسىمەن كۇن كورۋ.

بۇل - ۋكراينا تۇتىنۋشىلار سەبەتىنىڭ جاڭا جيىنتىعى. ۇكىمەتتىڭ ازىق-تۇلىك پەن ونەركاسىپ تاۋارلارىنا قاتىستى بەكىتكەن ەسەپتەۋى ۋكراين حالقى مەن مامانداردىڭ نارازىلىعىن تۋدىرىپ وتىر. ۋكراين حالقىنىڭ جاڭا تۇتىنۋشىلىق جيىنتىعىن 2000 -جىلعى كەزەڭمەن سالىستىرۋعا بولادى. الايدا قازىر دوللار مەن باعا بەس ەسەگە دەيىن ءوستى. ءبىراق مينيسترلەر كابينەتى قاراپايىم ۋكرايننىڭ ايىنا الپىس دوللارعا ءومىر سۇرە الاتىنىن ەسەپتەپ شىقتى.

بۇل اقشا كۇندەلىكتى ازىق-تۇلىكتەن بولەك، كيىم مەن تۇرمىستىق زاتتارعا، كوممۋنالدىق تولەمگە جانە جيھاز بەن ساياحاتقا جەتەتىن كورىنەدى.

اندرەي ريەۆا، ۋكراينانىڭ الەۋمەتتىك ساياسات ءمينيسترى:

- ۋكراينانىڭ مينيسترلەر كابينەتى قازان ايىندا ازىق- تۇلىك پەن ونەركاسىپ ونىمدەرىنىڭ جيىنتىعىن شىعارىپ، سول بويىنشا كۇندەلىكتى ءومىر سۇرۋگە قاجەتتى قاراجات ەسەپتەلدى. بۇل ماسەلە 15 -جىلدان بەرى قارالماعان ەدى. سوسىن مينيسترلەر كابينەتىن وسى جۇمىسپەن اينالىسۋعا سوتتىڭ شەشىمى ماجبۇرلەدى. قازىر سوتتىڭ بۇل تالابى الىنىپ تاستالدى. ءبىراق مينيسترلەر كابينەتى ءوز ەسەپتەۋىن جاساپ شىقتى.

جاڭا ءتىزىم بويىنشا قاراپايىم ۋكراين ازاماتى كۇندىز 75 گرامم ەت، 30 گرامم بالىق، ءبىر اس قاسىق قاراقۇمىق جانە كۇرىش، ءبىر ستاقان ءسۇت پەن ءبىر قاسىق كىلەگەي، جارتى جۇمىرتقا، ەكى كارتوپ پەن بەس ءتىلىم نان جەۋى ءتيىس ەكەن.

الەكساندر وحريمەنكو، ۋكراينا ساراپتاۋ ورتالىعىنىڭ پرەزيدەنتى:

- ۋكراينادا ايىنا 1600 گريۆەنمەن ءومىر ءسۇرۋ دەگەن قيالدان تۋعان وي ەكەنىن پرەمەر- مينيستر دە، پرەزيدەنت تە بارلىق مينيسترلەر دە بىلەدى. ءبىراق ولار مۇنى تۇسىنسە دە باسقاشا كەيىپ تانىتادى. بۇل حالىقپەن ويناۋ عوي. ولار لايىقتى زەينەتاقىمەن قامتاماسىز ەتە الماي وتىر. سوعان قاراماستان تۇرعىنداردىڭ تۇتىنۋشىلىق جاعدايىنا ارالاسىپ، نە كەرەك ەكەنىن وزدەرى بەلگىلەپ قويعان.

ۇكىمەت بالالاردىڭ دا قاجەتتىلىگىن ات ءۇستى شەشىپ تاستادى. جورگەكپۇل تىزىمدە جوق، ال ءبىر جايالىقتى ەكى جىل پايدالانۋ كەرەك. ەرەسەك بالالاردىڭ جاعدايى ءتىپتى كۇلكىلى. يىسسۋمەن ءبىرجولاتا قوش ايتىستى. الەۋمەتتىك ساياسات مينيسترلىگىنىڭ مالىمەتىنشە، قازىرگى جۇيەمەن ۋكراين حالقىنىڭ 59 پايىزى ءومىر سۇرەدى. ال ماماندار ەكونوميكالىق جاعدايعا ساي تۇتىنۋشىلاردىڭ جيىنتىعى بەس ەسەگە ازايعانىن ايتادى.


24.kz