قازاقستاندا جايىلىم 200 ميلليون گەكتار، ەگىستىككە جارامدى ەگىس القابى 45 ميلليون گەكتار

بۋراباي. قازاقپارات - شىمكەنتتە وتەتىن شەتەل ينۆەستورلارى كەڭەسىنىڭ كەلەسى وتىرىسىندا اگروبيزنەستى دامىتۋ ماسەلەلەرى تالقىلانادى.

بۇل جايىندا بۇگىن ق ر پرەزيدەنتى جانىنداعى شەتەل ينۆەستورلارى كەڭەسىنىڭ 27- جالپى وتىرىسىن قورىتىندىلاعان ەلباسى نۇرسۇلتان نازاربايەۆ ايتتى.

«ءبىزدىڭ ساراپشىلارمەن، سىزدەرمەن اقىلداسقان ۇكىمەت ماعان بايان ەتتى، 28- وتىرىستىڭ كەلەسى تاقىرىبىن «قازاقستانداعى اگروبيزنەستى دامىتۋ» دەپ تاڭدايمىز. مەنىڭشە، بۇل توسىننان ەمەس. بارلىقتارىڭىزعا دا دۇنيەجۇزىلىك بانكتىڭ زەرتتەۋلەرى كورسەتىپ وتىرعانداي، ازىق- تۇلىك تۇتىنۋشىلىق وسە تۇسەتىندىگى بەلگىلى. 2050 - جىلعا قاراي ادامزات سانى 9 ميللياردتى قۇرايدى جانە ازىق- تۇلىك قاجەتتىلىگى 2 ەسەگە ارتادى» ، - دەدى ەلباسى.

وسى ورايدا مەملەكەت باسشىسى قازاقستاندا اۋىل شارۋاشىلىعىنا جارامدى جەردىڭ مول ەكەندىگىن باسا ايتتى.

«تەك جايىلىمنىڭ ءوزى 200 ميلليون گەكتار. ەگىستىككە جارامدى ەگىس القابى 45 ميلليون گەكتار. ەگەر ولاردىڭ ونىمدىلىگىن 30 پايىزعا ارتتىراتىن بولساق، ءبىز ازىق- تۇلىكتىڭ مول ءونىمىن الا الامىز. گەكتارىنان 12-15 تسەنتنەر العاننىڭ وزىندە بىزدەر قازىردىڭ وزىندە 10 ميلليون توننا ازىقتىق استىقتى ەكسپورتتاپ وتىرمىز. بۇگىنگى تاڭدا باسقا دا ەلدەرگە، ەڭ الدىمەن رەسەيگە ەت ونىمدەرىن جەتكىزۋ بويىنشا اۋقىمدى باعدارلامانى شەشۋدەمىز» ، - دەدى قازاقستان پرەزيدەنتى.

اۆتور: مارلان جيەمباي