قۇرمانعازىنىڭ 200 جىلدىعى: ورالدا 1500 ادام كۇي تارتادى
وبلىستىق مادەنيەت باسقارماسى باسشىسىنىڭ ورىنباسارى سايران دۇيسەنتەگىنىڭ ايتۋىنشا، 19- قىركۇيەك كۇنى ساعات 18.00 دە قازاقستاننىڭ تۇڭعىش پرەزيدەنتى الاڭىندا 1500 ادام «ناعىز قازاق - دومبىرا» اتتى شارا بارىسىندا ءبىر مەزگىلدە قۇرمانعازىنىڭ «بالبىراۋىن» جانە «اداي» كۇيلەرىن تارتادى.
بۇلاردىڭ 700 ءى وبلىس اۋداندارىنان، قالعانى قالادان جينالادى. ورىنداۋشىلاردىڭ اراسىندا وقۋشىلار، قاراپايىم تۇرعىندار، ءتۇرلى ماماندىق يەلەرى بولادى. بارلىق ەرىكتىلەر الدىن الا جازىلا الادى. ولار الدىمەن 18- قىركۇيەك كۇنى الاڭعا كەلىپ، دايىندالادى.
ەكىنشى شارا - «ۇلى دالا مۇراسى» اتتى رەسپۋبليكالىق دومبىراشىلار بايقاۋى. 18- قىركۇيەك كۇنى جاستار مادەنيەت ۇيىندە وتەتىن كۇي دوداسىنا قازىردىڭ وزىندە جيىرماعا جۋىق ۇمىتكەر قاتىسۋعا تىلەك ءبىلدىرىپ وتىر. وعان ەرمەك قازيەۆ، ايتجان توقتاعان، ورىنباي دۇيسەنوۆ، ايگۇل ۇلكەنبايەۆا سىندى ونەر مايتالماندارى قازىلىق ەتەدى.
سونىمەن قاتار 19- قىركۇيەك كۇنى ح. بوكەيەۆا اتىنداعى وبلىستىق قازاق دراما تەاترىندا «جاھاندانۋ الەمى - قۇرمانعازى ساعىرباي ۇلىنىڭ ماڭگىلىك مۇراسى» دەگەن تاقىرىپتا رەسپۋبليكالىق عىلىمي-تاجىريبەلىك كونفەرەنسيا وتەدى.
مۇنىڭ ءبارى كۇي اتاسى قۇرمانعازىنىڭ باي مۇراسىن ناسيحاتتاۋ، ءومىرى مەن شىعارماشىلىعىنا قاتىستى دەرەكتەردى انىقتاي ءتۇسۋ، حالىقتى، اسىرەسە، جەتكىنشەك جاستاردى ۇلتتىق مۋزىكا تۋىندىلارىمەن سۋسىنداتۋ ماقساتىندا ۇيىمداستىرىلىپ وتىر.
