استانا اكىمدىگى زەينەتكەرلەر مەن مۇگەدەكتەرگە كومىر ساتىپ الۋعا 20,9 ميلليون تەڭگە ءبولدى

بۇل تۋرالى استانا قالاسىنىڭ جۇمىسپەن قامتۋ جانە الەۋمەتتىك قورعاۋ باسقارماسى «سارىارقا» اۋدانى بويىنشا الەۋمەتتىك جاردەماقىلاردى تاعايىنداۋ ءبولىمىنىڭ باسشىسى سالتانات ستامبايەۆا ءمالىم ەتتى، دەپ حابارلايدى «قازاقپارات» ح ا ا ءتىلشىسى.
«بۇگىنگى تاڭدا الەۋمەتتىك كومەك كورسەتۋدىڭ كولەمىن بەلگىلەۋ جانە كەيبىر ازاماتتاردىڭ كاتەگورياسىن انىقتاۋ ەرەجەسىنە سايكەس، كومىردى ساتىپ الۋ بويىنشا الەۋمەتتىك كومەك كارىلىك جاسىنا بايلانىستى زەينەتكەرلەرگە جانە مۇگەدەكتەرگە عانا بەرىلەدى. ال كوپبالالى وتباسىلارعا جەڭىلدىكتەر قاراستىرىلماعان. الەۋمەتتىك كومەك كورسەتۋ ەرەجەلەرىنە سايكەس، جەر ۇيدە تۇراتىن زەينەتكەرلەرگە جاردەماقى بەرىلەدى. زەينەتكەردىڭ ءوز اتىندا ءۇي بولسا جانە باسقا قالادا ەكىنشى ءۇيى بولماعان جاعدايدا، سونداي-اق وتباسىنا شاققانداعى تابىسى ەڭ تومەنگى كۇنكورىس دەڭگەيىنىڭ ءۇش ەسەلەنگەن كولەمىنەن اسپاسا (وتباسىنىڭ تابىسى 82 548 تەڭگەدەن از بولسا)، كومىردى ساتىپ الۋعا كومەك كورسەتىلەدى.
الەۋمەتتىك كومەكتىڭ مولشەرى 18152 تەڭگەنى قۇرايدى. ياعني، بۇل ەرەجەگە سايكەس، كورسەتىلەتىن الەۋمەتتىك كومەكتىڭ مولشەرى 8 ا ە ك- تەن اسپاۋى كەرەك.
الەۋمەتتىك كومەك 15- قازاننان 15- ءساۋىر ارالىعىندا بىررەتتىك تارتىپپەن عانا بەرىلەدى»، - دەيدى سالتانات ستامبايەۆا.
ونىڭ ايۋىنشا، ءدال وسىنداي كومەك ءۇش توپتىڭ مۇگەدەكتەرىنە دە قاراستىرىلعان. دەمەك، ءبىر وتباسىدا ءبىر مۇگەدەك ادام بولسا، ول مەكەنجاي انىقتاماسى ارقىلى جاردەماقىعا ءوتىنىم بەرەدى. ەگەر الەۋمەتتىك كومەك الاتىندار بىرەۋدىڭ ءۇيىن جالداپ تۇرىپ جاتسا، ول ءۇي يەسىمەن وتىرعان كەلىسىمشارت ارقىلى اكىمدىككە ءوتىنىم بەرە الادى.
«اتالعان ەكى توپقا كومىر ساتىپ الۋ بويىنشا كومەك كورسەتۋ ءۇشىن جەرگىلىكتى بيۋدجەتتەن 20 ميلليون 900 مىڭ تەڭگە ءبولىنىپ وتىر»، - دەپ ءتۇيدى سالتانات ستامبايەۆا.
اۆتور: ايان بەكەن ۇلى