ەلىمىزدەگى بولشەك ساۋدا كولەمى 20,8 پايىز ءوستى

استانا. قازاقپارات - بيىل قاڭتاردا قازاقستانداعى بولشەك ساۋدا كولەمى 1059,1 ميلليارد تەڭگەگە جەتتى.

بۇل وتكەن جىلدىڭ ءتيىستى كەزەڭىمەن سالىستىرعاندا 20,8 پايىزعا ارتىق. ال ساۋدامەن اينالىساتىن كاسىپورىنداردىڭ تاۋارلاردى بولشەك ساۋدادا وتكىزۋ كولەمى 32,6 پايىزعا ءوستى.

بۇل تۋرالى قازاقپارات ءتىلشىسى ۇلتتىق ستاتيستيكا بيۋروسىنا سىلتەمە جاساپ حابارلايدى.

بيۋرو دەرەگىنشە، ازىق-تۇلىك تاۋارلارىنىڭ بولشەك ساۋداداعى جالپى ۇلەسى - 27,6 پايىز، ال وزگە دە تاۋار تۇرلەرى بويىنشا - 72,4 پايىز.

مىنا تاۋار تۇرلەرىن ساتۋ بويىنشا ەڭ كوپ ءوسىم تىركەلدى:

- فارماتسيەۆتيكالىق تاۋارلار؛

- موتور وتىنى؛

- اۆتوموبيل، اۆتوموبيل بولشەكتەرى؛

- نان-توقاش، ۇننان جاسالعان جانە كونديتەرلىك ونىمدەر؛

- توقىما جانە شۇلىق بۇيىمدارى، كيىم؛

- كومپيۋتەرلەر؛

- كوسمەتيكالىق تاۋارلار مەن جەكە گيگيەنا قۇرالدارى.

قوسا كەتەيىك، بۇعان دەيىن ۇلتتىق ستاتيستيكا بيۋروسى بيىل جالدامالى پاتەر قۇنى 2,5 پايىزعا تومەندەگەنىن مالىمدەپ ەدى.