ساياساتتانۋ دوكتورى: 20- عاسىردىڭ زۇلماتتارى بولماعاندا، قازاقتىڭ سانى قازىر 80 ميلليون ادام بولار ەدى
قازاقستاننىڭ بەلگىلى جاس تاريحشىلارى، ساياساتتانۋشىلارى مەن الەۋمەتتانۋشىلار قاتىسقان دوڭگەلەك ۇستەل بارىسىندا «الەم. ХХІ عاسىر مانيفەسى» تالقىلاندى. سونداي-اق، وتكەن عاسىرداعى سۇراپىل سوعىستاردىڭ ءالى سەزىلىپ كەلە جاتقان زاردابى ايتىلدى.
«الەم. ХХІ عاسىر» مانيفەسى ارقىلى قازاقستان رەسپۋبليكاسىنىڭ پرەزيدەنتى جەردەگى بەيبىتشىلىكتى ساقتايتىن قۇجات ۇسىنىپ وتىر. قازاقستان - ادامزات تاريحىندا يادرولىق قارۋدان رەسمي باس تارتقان العاشقى مەملەكەت، سەمەي پوليگونىن جاپقان ەل. يادرولىق قارۋدى جەردە دە، سۋدا دا، اۋادا دا پايدالانۋعا بولمايدى. ەلباسى مانيفەسى تەك يادرولىق قارۋعا ەمەس، جەر بەتىندەگى كەز كەلگەن سوعىس تۇرىنە قارسى ۇندەۋ»، - دەدى دوڭگەلەك ۇستەلدى اشا وتىرىپ ق ر ۇلتتىق مۋزەيى تاريح ءبولىمىنىڭ جەتەكشىسى شىنار ءۋايسوۆا.
دوڭگەلەك ۇستەلگە قاتىسقان ساياساتتانۋشى، فيلولوگيا عىلىمدارىنىڭ كانديداتى، ساياساتتانۋ دوكتورى مۇحيت-ارداگەر سىدىقنازاروۆ «اسكەري وقيعالار مەن گۋمانيتارلىق ديتسيپلينانىڭ ماقساتى - وتكەننىڭ قاتەلىگىن قايتالاتپاۋ» دەگەن پىكىرىن ءبىلدىردى.
«ەگەر ءبىرىنشى دۇنيەجۇزىلىك ازاماتتىق سوعىستاعى، ودان كەيىنگى اشارشىلىق پەن رەپرەسسيانى، 1941-1945-جىلداردىڭ سوعىسىنداعى ادام شىعىنىن ەسەپتەسەك، قازىر قازاقستاننىڭ حالقى 80 ميلليون ادامدى قۇرايتىن ەدى. 20- عاسىردىڭ باسىنداعى قازاقستانداعى حالىق سانى 21- عاسىردىڭ باسىنداعى مىسىر حالقىنىڭ سانىمەن تەڭ. قازىر مىسىردا 80 ميلليون حالىق بار، ءبىز 17 ميلليون حالىقپىز»، - دەي وتىرىپ م. سىدىقنازاروۆ كەز كەلگەن سوعىس ادامزاتقا اۋىر قايعى اكەلەتىنىن اتاپ ءوتتى.
«بەيبىت ءومىر باردا، ونىڭ باعاسى بىلىنبەيدى. بەيبىتشىلىك - تەك سوعىس پەن قۇربانداردىڭ «فونىندا» قاتتى بايقالادى»، - دەپ ءسوزىن ءتۇيدى ساياساتتانۋشى.
اۆتور: كەنجەكەي توقتامۇرات قىزى
