تۇركيادا 20-اقپاندا بولعان جەر سىلكىنىسىنەن زارداپ شەككەندەر 562 ادامعا جەتتى

انكارا. قازاقپارات – 20-اقپاندا ەپيسەنترى تۇركيانىڭ حاتاي پروۆينسياسىنىڭ دەفنە اۋدانىندا بولعان 6,4 بالدىق جەر سىلكىنىسىنەن 6 ادام قازا تاۋىپ، 562 تۇرعىن زارداپ شەكتى.

بۇل تۋرالى حاتايداعى ۇيلەستىرۋ ورتالىعىندا وتكەن بريفينگتە تۇركيانىڭ ىشكى ىستەر ءمينيسترى سۇلەيمان سويلۋ ايتتى، دەپ حابارلايدى قازاقپارات انادولى اگەنتتىگىنە سىلتەمە جاساپ.

ونىڭ مالىمەتىنشە، زارداپ شەككەندەردىڭ 18 ىنىڭ جاعدايى تىم اۋىر.

ۆەدومستۆو باسشىسى قازىرگى ۋاقىتتا حاتايدا قۇلاعان بەس عيماراتتا ىزدەستىرۋ-قۇتقارۋ جۇمىستارى ءالى جالعاسىپ جاتقانىن جەتكىزدى.

مينيستر ازاماتتاردى بۇلىنگەن عيماراتتار مەن قۇرىلىستارعا كىرۋگە سالىنعان تىيىمدى قاتاڭ ساقتاۋعا شاقىردى.

بۇعان دەيىن تۇركيانىڭ دەنساۋلىق ساقتاۋ ءمينيسترى فاحرەددين قوجا تۇركيانىڭ حاتاي پروۆينسياسىندا دۇيسەنبى كۇنى كەشكە بولعان جەر سىلكىنىسىنەن 294 ادامنىڭ زارداپ شەككەنىن حابارلادى.

تۇركيانىڭ وڭتۇستىگىندەگى حاتاي پروۆينسياسىنىڭ دەفنە ايماعىندا 20-اقپان كۇنى كەشكە بولعان 6,4 بالدىق جەر سىلكىنىسىنەن كەيىن ايماقتا 90 جەراستى دۇمپۋلەرى تىركەلدى، ونىڭ ەڭ جوعارعى ماگنيتۋداسى 5,8 گە جەتتى.

سونداي-اق ب ا ق سيرياداعى جەر سىلكىنىسىنىڭ بەس قۇربانى تۋرالى حابارلادى.

6-اقپاندا ەپيسەنترى تۇركيانىڭ كاحرامانماراش پروۆينسياسىنىڭ پازاردجيك اۋدانىندا بولعان جەر سىلكىنىسىنىڭ قۇرباندارى 41 مىڭنان استى.

فوتو: aa.com.tr