قازاقستان فۋتبول فەدەراتسياسى 20 قالا مەن 50 اۋىلدا جاڭا الاڭ سالماقشى

استانا. قازاقپارات - قازاقستان فۋتبول فەدەراتسياسىنىڭ پرەزيدەنتى ادىلەت بارمەنقۇلوۆ حالىقارالىق فۋتبول فەدەراتسياسىنىڭ (FIFA) پرەزيدەنتى دجانني ينفانتينومەن وتكەن باسپا ءسوز كونفەرەنتسياسىندا بۇقارالىق فۋتبولدى دامىتۋ باعىتىنداعى جوسپارىن ورتاعا سالدى، دەپ حابارلايدى قازاقپارات ءتىلشىسى.

«ءبىزدىڭ نەگىزگى مىندەت - فۋتبولدى ساپالى جانە قولجەتىمدى ەتۋ. وسى تۇرعىدان الساق، بۇقارالىق فۋتبولدى دامىتۋ ءۇشىن بار كۇشىمىزدى سالىپ جاتىرمىز. FIFA- مەن ۇلكەن-ۇلكەن ءۇش باعىتتى دامىتۋعا كەلىستىك. بالالار فۋتبولىن دامىتۋعا ارنايى باعدارلاما جاساپ جاتىرمىز»، - دەدى فەدەراتسيا باسشىسى.

سونداي-اق، ول فۋتبول ينفراقۇرىلىمىن دامىتۋ باعىتىنداعى جوسپارلارعا توقتالدى.

«بۇيىرسا، الدىمىزدا 20 قالادا فۋتبول الاڭىن سالساق، سودان كەيىن اۋىلدارعا كوشەمىز. «اۋىلداعى فۋتبول» باعدارلاماسى بويىنشا 50 اۋىلدا ويىن الاڭىن سالىپ بەرسەك دەپ وتىرمىز. بۇقارالىق فۋتبولدى كوتەرۋگە قاجەت ەڭ باستى دۇنيە سول دەپ سەنەمىن»، - دەدى قازاقستان فۋتبول فەدەراتسياسىنىڭ پرەزيدەنتى.