ا ق ش-تا تابيعات اپاتىنان 20 دان اسا ادام قازا تاۋىپ، 50 دەن استامى ءىز-ءتۇسسىز كەتتى - ۆيدەو

نۇر-سۇلتان. قازاقپارات – سەنبىدە ا ق ش-تىڭ تەننەسسي شتاتىندا باستالعان سۋ تاسقىنىنان كەم دەگەندە 21 ادام قازا تاۋىپ، 50 دەن اسا ادام ءىز-ءتۇسسىز كەتتى، - دەپ حابارلايدى WKRN تەلەارناسى.

ا ق ش پرەزيدەنتى دجو بايدەن حالىققا ۇندەۋ جولداپ، تابيعي اپاتتان زارداپ شەككەن وتباسىلارعا كوڭىل ايتتى. سونىمەن قاتار، ول اكىمشىلىك جەرگىلىكتى حالىققا «وسىنداي قيىن ساتتە» كەز كەلگەن كومەك كورسەتۋگە دايىن ەكەنىن ايتتى.

تەننەسسيدەگى سۋ تاسقىنىنا جۇمادان بەرى جاۋعان نوسەر سەبەپ بولدى. كەيبىر قالادا ءبىر كۇنىك جاۋىن-شاشىن مولشەرى بويىنشا رەكورد جاڭارعان. تەننەسسي شتاتىنىڭ توتەنشە جاعدايلار اگەنتتىگى سۋ تاسقىنى قاۋپىنىڭ ءۇشىنشى دەڭگەيىن جاريالاپ، تۇرعىنداردى كولىك جۇرگىزبەۋگە، سۋ باسقان جولداردان اۋلاق بولۋعا شاقىردى.

تەلەارنا مالىمەتىنشە، ەڭ قاتتى زارداپ شەككەن اۋداننىڭ ءبىرى حامفريس وكرۋگىندەگى ۋاۆەرلي قالاسى بولعان.