قوردايدا 20 ميلليارد تەڭگەدەن اساتىن 400 گە جۋىق جوبا جۇزەگە اسىرىلىپ جاتىر
جامبىل وبلىسىنىڭ اكىمى بەردىبەك ساپاربايەۆ اۋدانداعى ەكى كۇنگە جوسپارلانعان جۇمىس ساپارى بارىسىندا اتالعان جوبالاردىڭ ساپالى ورىندالۋى، قوردايلىقتاردىڭ قوعامدىق-ساياسي احۋالى جانە كوڭىل-كۇيلەرى باستى نازارعا الىندى.
الدىمەن، كەنەن اۋىلىنداعى اۋىز سۋ ماسەلەسىنىڭ شەشىلۋ بارىسىمەن تانىسقان ايماق باسشىسى ءبىرقاتار ماسەلەلەرگە نازار اۋداردى.
بۇل تۇيتكىلدى شەشۋ ءۇشىن 132 ميلليون تەڭگەگە 16 شاقىرىمدىق سۋ قۇبىرى تارتىلىپ جاتىر. ونىڭ ىشىندە ءۇش شاقىرىم سىرتقى سۋ وتكىزگىش جانە 13 شاقىرىم ىشكى جەلى. قازىرگى ۋاقىتتا توعىز شاقىرىمدىق قۇبىر تارتىلعان.
اۋىلداعى وتباسىلىق دارىگەرلىك امبۋلاتوريادا 20 كەلۋشىگە ءبىر دارىگەر جانە سەگىز مەدبيكە قىزمەت كورسەتەدى. جاستاردىڭ جاقىن ورنالاسقان الماتى قالاسىنا كوپتەپ كەتۋىنە بايلانىستى كەنەندە تۋۋ كورسەتكىشى تومەندەۋدە.
سول سياقتى 600 ورىندىق ە. قاشاعانوۆ اتىنداعى 42№ مەكتەپتە بۇگىندە تەك 509 وقۋشى ءبىلىم الۋدا. وقۋ ورداسى جاڭا، 2014-جىلى پايدالانۋعا بەرىلگەن.
- بالالاردىڭ بويىنا ۇلتتىق سالت-ءداستۇر مەن قۇندىلىقتار نەگىزىن ءسىڭىرىپ، رۋحاني- ادامگەرشىلىك تۇرعىسىندا تاربيەلەۋگە ەرەكشە نازار اۋدارۋ قاجەت. اسىرەسە، كەنەندەي ۇلى تۇلعا تۋعان اۋىلدا بۇعان ايرىقشا دەن قويا بىلگەن دۇرىس، - دەپ اتاپ ءوتتى بەردىبەك ساپاربايەۆ.
جەرگىلىكتى تۇرعىندارمەن كەزدەسۋ بارىسىندا وبلىس اكىمى اۋىز سۋمەن قامتاماسىز ەتۋ ماسەلەسى شەشىلىپ جاتقانىن، كوشەلەردى جوندەۋ، جارىقتاندىرۋ جۇمىستارى جالعاستىرىلاتىنىن اتاپ ءوتتى.
بەس اۋىل گازداندىرىلىپ، شاعىن سۋ قويمالارى سالىنباق. ايماق باسشىسى كوپشىلىكتىڭ ايگىلى اڭىراقاي شايقاسىنىڭ ورنىنا مەموريالدىق كەشەن سالۋ تۋرالى ۇسىنىسىن قولدايتىنىن ايتتى.
ول سونداي-اق كەنەندىكتەردى مەملەكەتتىك باعدارلامالارعا بەلسەندى قاتىسۋعا، باستاماشىلىق پەن ىسكەرلىك تانىتۋعا شاقىردى. بيىل جىلى قورداي اۋدانىنداعى جولداردى جوندەۋگە جانە سالۋعا جەرگىلىكتى بيۋجەتتەن ءبىر ميلليارد تەڭگەدەن استام قارجى ءبولىنىپ، 352 شاقىرىمنان استام جول قالپىنا كەلتىرىلمەك.
وندا كەيبىر ورتاشا جوندەۋ جۇمىستارى اياقتالعان. اتاپ ايتقاندا، مۇزبەل اۋىلىنا كىرە بەرىستەگى جولدىڭ ەكى شاقىرىم بولىگى پايدالانۋعا بەرىلگەن. سونداي-اق، ءوڭىر باسشىسى اۋدانداعى تاۋلىگىنە 1000 تونناعا دەيىن قۇرىلىس ماتەريالدارىن شىعاراتىن بەتون-اسفالت زاۋىتىندا بولىپ، قالعۇتى اۋىلىندا جاڭا مەكتەپتىڭ قۇرىلىس جۇمىستارى وتە باياۋ جۇرگىزىلىپ جاتقانىن قاتتى سىنعا الدى.
ودان بولەك، ءالجان انا اۋىلىندا «سامۇرىق-قازىنا تراست» قورىنىڭ قاراجاتى ەسەبىنەن جۇرگىزىلەتىن دەنە شىنىقتىرۋ-ساۋىقتىرۋ كەشەنى قۇرىلىسىنىڭ جوباسىمەن تانىستى.
